Marfýǵa ájeı rekord jańartqysy keledi

Marfýǵa Seltetkenova ájeı­diń kelbeti men qımylyna qarap tańǵalmasqa bolmaıdy. Táńiri syılaǵan uzaq jasy men densaýlyǵy bolar, ájeıdi qashan kórseń de qaraǵaıdaı bolyp, dıvannyń ústinde kitap oqyp otyrady. Qyzy Jibek apaı ájemizdiń kitap oqyǵandy unatatynyn aıtady. Jas kezinde medresede oqyǵan, arab harpin jaqsy biletindikten kóbine «Qurandy» túpnusqasynan oqıdy eken. So­nymen qatar, ájeı shóbereleri ákelip bergen kitaptardy, jýrnaldardy qazaq, orys, tatar, bashqurt tilderinde birdeı oqı beredi. Marfýǵa ájeı Reseıdiń Qor­ǵan oblysynda 1902 jyly naý­ryz aıynda týǵan. Onyń ómiri taqtaıdaı tegis bolǵan joq. Za­mana ákelgen qıyndyqtardyń barlyǵyn da basynan ótkerdi. Ájeıdiń shaly Uly Otan so­ǵysyna attanǵanda, Marfýǵany eńbek armııasyna jiberedi. Sıyr da saýdy, astyq ta jınady, mal da baqty. Beınetti kórýindeı kórdi. Soǵystan burynǵy jyldary da jyrǵamaǵan edi. Ashqursaq ári úreımen ótkizgen jyldar az bolǵan joq. Marfýǵa 12 bala tárbıeledi, onyń ekeýi shalynyń burynǵy áıelinen qalǵan, baýyryna salǵan qyzdary eken. Olardan qazir 40 nemere, 30 shóberesi bar, tipti shópshekteriniń alaqanynan sý ishken baqytty jan. О́skemende turatyn úlken qyzy 97 jasqa kelipti. О́zin baǵyp-qaǵyp otyrǵan altynshy qyzy Jibek apaıdyń ózi jetpisti alqymdap qaldy. Búginde 115 jasqa tolyp otyrǵan ájeıdi jaqyn biletin týystary onyń aq kóńil, eshkimdi renjitpegen, júregi taza kisi ekenin aıtady. – Ol úıge kelgen kisiniń bar­lyǵyna batasyn berip otyrady, jas kúninen eshkimge jamandyq jasamapty, tili tımepti. Sosyn anam óte eńbekqor boldy. Júzden asyp ketkende de adamdarǵa quran súreleri jazylǵan tumarlar istep beretin, tigin tikti. Ol qarap otyrmaıdy, – deıdi qyzy Jibek apaı. Bir qyzyǵy, osydan eki jyl buryn Marfýǵa áje qatty aýyryp, eki aı tósek tartyp jatyp qalypty. Balalary anasy qaıtyp turmaıtyn bolar dep, daıyndala bastaıdy. «Jedel járdem» shaqyrǵany bolmasa, aýrýhanaǵa da aparmaıdy. Al Marfýǵa ájeı birte-birte beti beri qarap, jazylyp ketedi de, sol turǵannan keıin tamaq tańdamaıtyn bolypty. – Buryn asqa talǵammen qaraı­tyn, et, jumyrtqa, dúkendegi shu­jyqty, qant jemeıtin. Qazir bárin jeıdi, – deıdi Jibek apa kúlip. Marfýǵa ájeı áli shıraq. Jasy 112-ge kelgenshe bes ýaqyt namazyn úzbepti. Sózi de pysyq. Ol endi bir-eki jylda 117 jasqa kelse, Gınnestiń rekordtar kitabyna engen japondyq Mısao Okavany qýyp jetedi. Ájeıdiń ózi japondyq áıelden de asyp túskisi bar eken. Onyń bul arman-maqsaty negizsiz de emes, uzaq jasaý bul kisiniń anasy jaǵynan kelse kerek. Anasy da, taǵy bir naǵa­shy aǵasy da júzden asqan kórinedi. Názıra JÁRIMBETOVA, «Egemen Qazaqstan» QOSTANAI