Jańaózendik oqýshy Ramazan Qoıshybaev – bolashaǵynan úlken úmit kúttiretin izdenimpaz jas, joqtan bar jasaýdy maqsat etken ónertapqysh. Buǵan deıin adamnyń aralasýynsyz-aq perdeleri ashylyp, jaryq janatyn «Aqyldy úı» jobasyn oılap tapqan ol endi daıashy qyzmetin atqaratyn jáne adamdarmen sóılesip, tilek tileı alatyn qultemirdi oılap tapty.
Bıiktigi 40 sm bolatyn qultemir tamaqty alyp keledi, tamaqtyń daıyn bolǵandyǵyn habarlaıdy jáne tamaqty qolyna alǵan adamǵa «as dámdi bolsyn» degen tilegin arnaýdy da umytpaıdy.
Qultemir jasaýdy kópten oıynda jetildirip, damytyp júrgen oqýshy bir jyl syzbalaryn syzyp, eki aptada óz maqsatyna qol jetkizedi. О́nertapqysh tilek tilep, suhbattasa alatyn qultemirdiń sózdik qoryn molaıtýdy oılap júr. Ramazannyń ustazy B.Muhammed shákirtinen zor jetistikter kútedi.
– Az ýaqytta maǵan mıyn jasap, sóıletip, qalaı jasaıtynyn, qalaı júretinin kórsetti. Odan keıin syrtyn jasaýǵa kirisip ketti. Bul birinshi nusqasy, ony odan ári jetildirip, negizgi dızaınyna deıin jetkizý josparlanýda, – deıdi ustaz.
Al Ramazan bolsa japon úlgisinde daıyndalǵan qultemir bolashaqta meıramhanalarda qyzmet etetinine senimdi. Ol osy salada bilimin jetildirip, basqa da ıntellekt ıelerin oılap tappaq. Qazir ol kóktemdegi irikteýden ótip, Almaty qalasynda ótetin úlken saıystarǵa qatysýdy josparlap otyr.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
