Elimizge tanymal semeılik qolóner ıesi Qurman Abaıuly Aımuhanbetov Qytaı elinde, Sháýeshek qalasynda dúnıege kelgen. Keıinirek qana atamekenge oralǵan qandas baýyrlarymyzdyń biri. Sondyqtan bolar, onyń týǵan jerge degen ystyq sezimi, mahabbaty árbir týyndylarynan baıqalyp turady.
Búginde Qurman Abaıuly qaladaǵy eń úzdik oqý ornynyń biri – Bıznes jáne servıs kolledjinde tabysty eńbek etip júr.
– Meniń jas býyn stýdentterge sabaq berip qana qoımaı, osyndaı ónermen óz shyǵarmashylyǵymmen aınalysatynymdy baıqaǵan dırektorymyz, bilgir maman, bilikti basshy Almıra Baltabekqyzy Hojanova únemi qoldaý, kómek kórsetip turady, – deıdi Qurman aǵa aǵynan jarylyp, – kolledjde meniń avtorlyq kórmem turaqty jumys istep tur. Sonymen qatar, alǵashqy eńbekteri jaqsy jasalǵan shákirtterimniń de kórmesi birge qoıylǵan.
Jaqynda Astanada Qazaqstan Respýblıkasy Tuńǵysh Prezıdenti – Elbasy kitaphanasynda Semeı ıadrolyq synaq polıgonynyń qundy qujattaryna oraı kórme uıymdastyrylǵan edi. Kórmege músinshi bas-aıaǵy on bes dúnıe aparypty.
Qurman Abaıuly jasaǵan dúnıeler kórmede Elbasy Nursultan Nazarbaevtyń Semeı polıgonyn jabý, Kýrchatovtaǵy Ulttyq ıadrolyq ortalyǵyn ashý sııaqty kóptegen qundy qujattarymen qatar turypty. Sol týyndylarynyń qatarynda «О́lim sebýshi sańyraýqulaqtyń janýarǵa áseri», «Jarylys azaby», «Otqa oranǵan úsheý», «Qara jáne shoshy» sııaqty kóptegen ǵajaıyp músinder bar.
– Meniń kórmege qoıǵan jumystarymnan sharasyzdyqty ǵana kórmeńizder. Bul aldaǵy bolashaqqa qorqynysh, alańdatý dep túsinip, osyndaı sumdyqty adamdar endi qaıtalamasa degen eskertý. Árbir eksponat jan túrshiktiredi. Oıǵa batyrady. Bul aramyzda ómir súrip jatqan jandardyń prototıpi. Olar tek taýqymet shegip jatyr. Bireýdiń qatesi úshin azap shekkender. Osyny istegen Adam! – deıdi Qurman aǵa, – Myna bir músinimde, polıgonnyń zardaby tımese, shirkin, sulý qyzdar qaraıtyn jigitke aınalar ma edi degen bozbalanyń oıyn jetkizýge tyrystym. Árbir músinniń ózindik máni men maǵynasy bar. Beıneler oıdan shyǵarylmaıdy. Búginde Semeı polıgonynyń zardabyna baılanysty 30 músin jasaldy. Áli de 2 kólik aǵash butaqtary men shórkeler kezegin kútip tur.
Raýshan Nuǵmanbekova
Semeı
Sýretterdi túsirgen avtor
