Astanada otandyq ónimderdiń ortaq pavılony ashyldy

Otandyq kásipkerler usynǵan eń úzdik taýarlardy bir dúkennen satyp alýǵa bolady, dep jazady palata.kz. Astana qalasynda Eýrazııa isker odaǵynyń bastamasymen Odaqqa múshe elder men seriktesterdiń taýarlaryn, sondaı-aq keń aýqymda «Made in Kazakhstan» brendin qoldaý jáne nasıhattaý maqsatynda «Ekspo» saýda pavılonynyń ashylý saltanaty ótti. Ashylý saltanatyna Eýrazııa isker odaǵynyń Basqarma tóraǵasy Vıktor Kambolov, «Halyq markasy federasııasy» ZTB Prezıdenti Rımma Tájibaeva, «Qazaqstannyń saýda kásiporyndary qaýymdastyǵy» ZTB vıse-prezıdenti Jibek Ájibaeva, «EKSPO pavılon» saýda-kórme pavılonynyń bas dırektory Aıjan Nurlanova qatysty. «Búgingi ashylý saltanatynyń qyzyl lentasyn qımas buryn barshalaryńyzdy Eýrazııa isker odaǵy atynan otandyq ónimdi ilgeriletýdegi jasalǵan qadammen qazaqstandyq kásipkerlerdi quttyqtaǵym keledi. Bul – áriptes elder arasyndaǵy qyrýar eńbektiń jemisi», – dep quttyqtady Eýrazııa isker odaǵynyń Basqarma tóraǵasy Vıktor Kambolov. Shara barysynda jurtshylyq nazaryna pavılonǵa qoıylǵan úzdik taýarlar legi tanystyryldy. Jetpis jyldyq tarıhy bar «Symbat» akademııasy, «Aida KaumeNOVA» brendterinen bastap, tabıǵy boıaýlarmen árlengen qol qurty, kóne reseptimen daıyndalǵan «Dýdaraı» prıanıgi, konserviler, taǵy basqa da kóz jaýyn alatyn ónimder kóz jaýyn aldy. Sapasy men baǵasy úılesken taýarlar «Made in Kazakhstan» ataýyna ábden laıyq. Aıta ketelik, otandyq «Made in Kazakhstan» brendin qoldaý maqsatynda Eýrazııa isker odaǵynyń bastamasymen RF Máskeý qalasynda EAEO múshe eldirdiń taýar ónimderin taratýǵa arnalǵan iri «Food city» atty pavılon ashylǵan bolatyn. Seriktes elderdiń arasynan qazaqstandyq ónim sapasy jaǵynan suranysqa ıe bolǵan. Máskeý, Taıaý Shyǵys elderi, ásirese, qazaqstandyq qurǵaq qymyz, saýmal syndy salaýatty ómir saltyna ustanýda paıdaly ónimder erekshe baǵalaǵan. «Máskeýde ashylǵan saýda pavılonynda qazaqstandyq ónimge suranys artyp otyr. Bul otandyq taýaróndirýshileri úshin qýantarlyq jaǵdaı. Sondyqtan elorda tórinde búgin ashylǵan otandyq ónim pavılony taýardy eksportqa shyǵarmas buryn, sapasyna, taýarlyq belgisine, jalpy básekege tózimdiligin synaqtan ótkizý bolyp sanalady. Osy pavılon arqyly biz eksport joldaryn jaqsartý, otandyq ónimdi keńinen nasıhattaý boıynsha jumys isteımiz. Máselen, taýardyń syrtqy kelbetinen bastaımyz: qaptamasy standartqa saı ári tartymdy bolýy kerek, ataýy da ádemi bolýy shart, taýar sertıfıkasııadan ótti me, sapasyna qaraı baǵasy laıyq qoıyldy ma, osy máseleniń barlyǵy synalady. Osylaısha eksportqa shyqpas buryn ishki naryqta talaptardy qatań ustansaq, «Made in Kazakhstan» brendine degen suranys ta, bedel de artatyny sózsiz», – dedi «Halyq markasy federasııasy» ZTB Prezıdenti Rımma Tájibaeva. Federasııa basshysynyń aıtýynsha, pavılon otandyq taýardyń bir ortaǵa shoǵyrlanýy álem naryǵyna shynyqtyratyn katalızatorǵa aınalmaq. Ashylýdyń ózinde pavılonda 30-dan astam báseke ortasynda shyndalǵan taýaróndirýshiler óz ónimderin satylymǵa qoıǵan. Bul saýda alańy kez kelgen jańa otandyq ónimniń iri naryqqa shyǵýyna múmkindik beredi. «Pavılonnyń artyqshylyǵy – kásipkerlerge jasaǵan naqty kómek. Munda kásipkerler tegin oryn,tegin sý, jylý men jaryq, tegin satýshy qyzmetine ıe bola alady, tek qana sórelerdi tazalyqta ustaý, taýardy rettep turý, satyp alýshylarǵa taýardy tanystyrý syndy jumystaryna kózdelgen bir jylǵa 300 myń teńge ǵana tóleıdi. Astananyń ortalyǵynda barlyq jaǵdaı qarastyrylǵan dúken qyzmetin ıemdený tamasha múmkindik bolady», – dedi Rımma Tájibaeva. О́z sózinde Eýrazııa isker odaǵynyń Basqarma tóraǵasy qazaqstandyq kásipkerlerdiń belsendiligine, jaýapkershiligine tánti boldy. Úsh deńgeıli pavılonnyń jalpy kólemi 300 sharshy metrge teń. «Endi qazaqstandyq úzdik taýarlar EAEO múshe elderde, sondaı-aq odaq seriktesteri elderi naryǵyna shyǵa alatyn bolady. Ázirge pavılondardan biz bıznes kózin, paıdany oılap jatqan joqpyz. Bastysy kásipkerlerdiń aıaqqa turyp, álemdik naryqqa odaq músheleri usynǵan úzdik taýarlardyń aýqymdy legin shyǵarýǵa demeý jasaý bolyp otyr», – dedi Vıktor Kambolov.