Eńbeginiń zeıneti – 15 mınýtta!..

Erte me, kesh pe... mınıstr de, muǵalim de, jáı sharýa adamy men tanymal bıznes ıesi de, ataǵy dúrkiregen óner adamy men mádenıet qaıratkeri de osy ǵımarattyń bosaǵasynan attaıtyn halyqtyq dástúr bar. Eńbeginiń zeınetin kórýge quqyly árbir Qazaqstan azamaty bas suǵatyn bul mekeme – Memlekettik zeınetaqy tóleý ortalyǵy dep atalady. Almaty qalasynyń Áýezov aýdanyndaǵy osyndaı ortalyq dál búgin qala aýmaǵyndaǵy eń kóp sanalatyn 46 myń adamǵa aptanyń 6-y kúni qaltqysyz qyzmet kórsetip keledi. Halyqaralyq áıelder merekesi qarsańynda ujym quramyn negizinen 37 qyz-kelinshek quraıtyn mekemeniń – Áýezov aýdandyq Memlekettik zeınetaqy tóleý ortalyǵynyń basshysy Álııa MAQULBAEVANY áńgimege tartqan edik. – Álııa Dúısebaıqyzy, ortalyqtaǵy konveıer sekildi qaınap jatqan jumys bir saǵatqa toqtap qaldy delik!.. О́mirdiń ártúrli sebepterden quralatyny sekildi, mysaly, elektr qýatyn berý tejelip, kompıýterler sónip qalady. Sonda qyzmetkerlerińiz bir saǵat boıy nemen shuǵyldanady? – Onyńyz ras, tosyn jaǵdaılardyń týyndamasyna qaı ýaqytta da kepildik joq. Bizdiń qyzmetimiz tikeleı kompıýterlik júıege, ınternettik jelige baılanysty. Dese de, bir saǵatyńyz ne, biz 15 mınýt ta qol qýsyryp qarap otyra almaımyz. О́ıtkeni, bizge kelýshi áleýmettik toptar sanatyndaǵylar – zeınet jasyndaǵy azamattar, ekiqabat áıelder, ártúrli múgedektik toptaǵy qala turǵyndary tobynda shek bolǵan emes. Bizdiń qyzmetkerlerimiz qandaı jaǵdaıda da jumysyn kidirte almaıdy. Mekemege bas suqqan bir de bir adamnyń kóńiline qaıaý túspeýi tıis. Sondyqtan da, sham janǵansha, kompıýterlik jeli qosylǵansha, elektrondy naqty málimetter daıyn bolǵansha biz de hal-qaderimizshe kelýshige aýyzsha jaýap qaıtaryp, qyzmettik tehnıkalyq sebepterdiń jymyn bildirmeı jiberemiz. Odan qolymyz qalt etse, arhıvpen jumys isteımiz. Sondyqtan da, bizdiń jumys toqtaýsyz júrip jatqan konveıer ispetti. – Qyzdar tobynan quralǵan ujymdy basqarýdyń qandaı qıyndyqtary bolady? – О́zim de sol toptyń ókili bolǵandyqtan, qol astymdaǵy qyzmetkerlerge ózime qoıǵan talapty qoıamyn. Olar da men sekildi bireýdiń qyzy, kelini, zaıyby, anasy... Qandaı sátterde olardyń jan dúnıesin túsinýge tyrysyp baǵamyn. О́ıtkeni, olar – meniń áriptesterim. – Demek, áriptesterińizge qatal emessiz ǵoı?! – Jalpy... qatal emespin. Biraq ta, qajetti kezinde tabandy talaptar qoıa alamyn. Solaı bola tura, áriptesterimniń júregin jaralap alýdan aýlaqpyn. Mundaı halyq nópirimen qyzmet isteıtin mekemede erekshe tártip bolýy kerektigin bárimiz de túsinemiz. Qýanatynym sol. Qyzmetkerlerimniń barlyǵy da ózim sekildi, atqaryp otyrǵan mindetin jaqsy túsinedi. – О́zińiz týraly bir aýyz málimet berip ótseńiz? – Mamandyǵym – ekonomıst. Bul salada 11 jyldan beri eńbek etip kelemin. Jumysty jáı maman bolýdan bastap, salalyq qyzmettiń barlyq býynynan óte kelip, qazir aýdandyq ujymdy basqaryp otyrmyn. – Halqymyzda «Qyzdyń jasyn suramaıdy» degen jaqsy sóz bar, deıturǵanmen, ujymdaǵy qyzmet isteıtin qyz-kelinshekterdiń jas shamasy qanshada? – Ujymdaǵy qyzdardyń orta jasy – 25! Qyzmetimizdi kidirissiz dóńgeletip júrgizip otyrǵan da osy janyp turǵan jastarymyz. О́te elgezek, tyndyrymdy jas áriptesterimniń jan-jaqtan túsip turatyn ártúrli vakansııalarǵa saı qyzmetteriniń ósýine de qoldaý kórsetip turamyn. Taıaýda ujym bolyp qurmettep birneshe apamyzdy zeınetke shyǵaryp saldyq! – О́te jaqsy eken. Aıtpaqshy... sizderdiń ujymda zeınetke shyǵý óte jeńil shyǵar?! Qujat jınaý, keńes alý degen bári óz qoldaryńyzda degendeı... – Jo-joq... Nege olaı deısiz. Zań bárimizge ortaq. Zeınet jasyna jetken azamattarǵa qoıylatyn talap – bireý-aq. – Sizder zeınetke shyǵý, bala týǵannan keıingi kómek, múgedektik járdem alý degen sekildi on san túrli áleýmettik qoldaý kórsetýge zárý toptarmen jumys isteısizder. Mundaı sátterde isi bir jaıly bolǵan azamattar kóńili toǵaıǵan soń elgezek ujymnyń ókiline syılyq jasap jiberýge daıyn turady... – Túsindim... Biz darhan kóńildi halyqpyz ǵoı. Tıtteı jaqsylyq kórseń, sol jaqsylyqqa asyra máziret jasaýǵa asyǵyp turamyz. Ondaı syı-sııapat jasaǵysy kelip turatyndar bolady. Biraq, halyqqa minsiz qyzmet kórsetý – bizdiń tól mindetimiz ekenin kópshilikke bappen túsindiremiz. Bizge aýyzsha alǵystyń ózi jetkilikti ekenin jetkizemiz. Bizdiń árbir qyzmet-qımyldarymyz beınekameralar arqyly baqylanatynyn búginde kelýshilerdiń ózderi de jap-jaqsy bilip alǵan. Alǵys hat jazsa qabyldaımyz. Munyń barlyǵy da órkenıettiń sátti jasalǵan qadamdary ǵoı... Áleýmettik ártúrli toptaǵy azamattar kún saıyn esigimizden ondap, júzdep attap jatady. Esikten kire aıqaılap keletinder nemese bir aýyz sózge kelmeı shý kóteretin adamdar, júıkesi syr bergen azamattarmen jumys isteý de ońaı emes. Solardyń barlyǵyna jyly qabaq tanytyp, jaıly sóılesýge beıimbiz. Bizdiń shýaqty kóńil-kúıimizdi kórip olar da jumsaryp sala beredi, ashýy basylady. Qysqasy, ortalyqqa jylap kelse de, jadyrap-kúlip ketip jatady... – Áńgimeńizge rahmet. Qyzdar ujymyn tól merekesimen quttyqtaımyz, tabysty bolyńyzdar! Áńgimelesken Talǵat SÚIINBAI, «Egemen Qazaqstan» ALMATY Sýretti túsirgen Nurmanbet QIZATULY