«Barselona» PSJ-ǵa alty gol salyp, shırek fınalǵa joldama aldy (vıdeo)

Chempıondar lıgasy 1/8 fınalynyń ekinshi matchynda «Barselona» óz alańynda «Parı Sen Jermen» klýbyn 6:1 esebimen utyp, shırek fınalǵa joldama aldy. Oıyn bastala sala shabýylǵa umtylǵan alań ıeleri 3-mınýtta-aq Sýarestiń kómegimen esep ashyp úlgerdi. Qarqyndaryn údete túsken katalondyqtar alǵashqy taımnyń sońyna taman parıjdikterdi taǵy bir márte qapy qaldyrdy. Bul rette Andres Inestanyń sheberliginiń arqasynda Leven Kýrzava óz qaqpasyna gol soǵyp aldy. Al qonaqtar bastapqy taımda aıtarlyqtaı qarsylyq tanyta almady. Lýkas Moýranyń alystan baǵyttaǵan soqqysynan bólek, jarytyp eshnárse isteı qoımady. Matchtyń ekinshi taımyn parıjdikter ózgeshe kúıde bastady. Aıaqtaryna dop tıe salysymen, birden Ter Shtegenniń qaqpasyna qaraı umtyldy. Degenmen, nemis qaqpashysynyń joly bolyp, qaýiptiń betin qaıtara bildi. Al kezekti sátterdiń birinde óz aıyp alańynda Neımarǵa qarsy oıyn tártibi buzylǵany úshin penaltı belgilendi. Mundaı sheshim qosymsha tóreshiniń aıtýymen qabyldandy. Al Messı ózine berilgen múmkindikti jibere qoımady. О́z kezeginde qonaqtar da qarap qalmady. Alańǵa Anhel Dı Marııa shyǵyp, PSJ-nyń oıynyna qan júrgendeı boldy. 62-mınýtta aıyp dobynan asyrylǵan dopqa Tomas Mene birinshi bolyp jetip, Kavanıge yńǵaılap berdi. Ýrýgvaılyq shabýylshy bul tusta joıqyn soqqysymen óz ujymynyń alǵashqy golyn saldy. Osydan keıin Lýıs Enrıke shákirtteriniń qarqyny báseńdep, súreńsiz oıyn órbidi. Degenmen, parıjdikter ekinshi golyn da salatyn kezderi bolǵan, biraq Anhel Dı Marııa, Edınson Kavanı syndy bilikti oıynshylar qaqpashy Ter Shtegenmen jeke shyqqanmen, dittegen maqsattaryna jete almady. Negizgi ýaqyttyń aıaqtalýyna eki mınýt qalǵanda Neımar aıyp dobyn sátti oryndap, komandasyna dem berdi. Osydan keıin kambek bolatynyna kópshilik kúmánmen qaraǵan edi. 91-mınýtta Sýareske qarsy oıyn tártibi buzylǵany úshin penaltı belgilenip, ony Neımar sátti oryndady. Dál osy goldan keıin qos komanda úshin naǵyz syn saǵaty ornady. Biri óz qaqpasyn kezekti goldan aman alyp qalý kerek bolsa, ekinshisi salý kerek boldy. Osy ýaqytta Neımar bar jaýapkershilikti óz moınyna alyp, sońǵy sekýndttarda aıyp alańyna dopty áýelete tastady. Bul rette alańǵa tyńnan qosylǵan Serhı Roberto jeńisti goldy soǵyp, "Barselonanyń" kelesi kezeńge ótýine úlken septigin tıgizdi. Aıta keteıik, katalondyqtar alǵashqy oıynda PSJ-dan 0:4 esebimen kúıreı  jeńilgen bolatyn. Sondaı-aq, Chempıondar lıgasynyń tarıhynda dál osyndaı iri eseppen ese jibere turyp, kelesi kezeńge joldama alǵan komanda bolǵan emes. «Barselona» fýtbol tarıhyn taǵy bir márte jańartty deýge tolyqtaı negiz bar.