Taqsaı hanshaıymy

  Batys Qazaqstan oblysynyń Terekti aýdanyndaǵy Taqsaı qorǵanynan 2012 jyly tabylǵan aqsúıek sarmat áıeliniń qabiri otandyq arheologııa ǵylymyndaǵy zor tabystyń biri retinde esepteledi. Qabirden áıeldiń múrdesimen birge áshekeıleri, japyraqty japsyrmalary, bilezikteri tabylǵan. Jáne munyń bári altynnan bolatyn. Esik qorǵanynan tabylǵan áıgili «Altyn adam» beınesin qalpyna keltirgen ǵalym-restavrator Qyrym Altynbektiń jetekshiligimen aqsúıek áıeldiń músini qaıta jańǵyrtyldy. Qazirgi tańda «Taqsaı hanshaıymy» degen atty ıelengen bul eskertkish jádigerdiń túpnusqasy Ulttyq mýzeıde saqtaýly tur. «Taqsaı hanshaıymynyń» qabirin ǵalymdar bizdiń zamanymyzǵa deıin V-VI ǵasyrlarǵa jatqyzdy. Biraq, qaıtys bolǵan áıeldiń jasy neshede ekeni anyqtalmaǵan. Jalpy, Taqsaı kesheninen qabirden basqa kóptegen jádigerler tabylǵany buqaralyq aqparat quraldary arqyly málim bolǵan-dy. «Keshennen tabylǵan jádigerlerdiń kóptigi men aqparattyq turǵydaǵy róli ony mańyzdy ete túsedi. Bul qorǵandy zertteý arqyly otandyq ǵylymdaǵy eń bir úlken ashylý jasaldy», degendi aıtqan edi arheolog. Aıgúl SEIILOVA, «Egemen Qazaqstan» Sýretti túsirgen Orynbaı BALMURAT, «Egemen Qazaqstan»