Sot tóreligindegi jańashyl baǵyttar

Almatyda Joǵarǵy sot "Atameken" ulttyq kásipkerler palatasymen birigip "Kásipkerlik qyzmet sharttaryn jaqsartý úshin azamattyq-prosestik zańnamany jetildirý" taqyrybynda dóńgelek ústel ótkizdi. Jıynǵa Joǵarǵy sottyń maman­­­­dan­dyrylǵan sot alqasynyń tóraıy­my Aıgúl Qydyrbaeva, «Ata­meken» UKP basqarma tór­aǵa­sy­nyń orynbasary Rús­tem Júr­sinov, Joǵarǵy sot janyn­daǵy Halyq­aralyq keńes múshe­si, Qazaq­standaǵy «KazBar» kommer­sııa­lyq zańgerler assosıasııasy bas­qarý keńesiniń tóraǵasy Aıgúl Ken­jebaeva, sondaı-aq, Joǵar­ǵy sot pen jergilikti sottardyń sýdıa­­lary, memlekettik organdar, bız­nes qaýymdastyq ókilderi qatysty. Alǵashqy bolyp sóz alǵan Aıgúl Qydyrbaeva elimiz táýel­sizdik alǵan ýaqyttan beri ulttyq sot tóreligi zań ústemdigin qamta­ma­syz etýdiń jáne qoǵamdaǵy tu­raq­tylyqtyń senimdi kepili bola bilgenin, al Qazaqstan azamat­tarynyń quqyqtaryn sot arqyly qorǵaý deńgeıi halyqaralyq ozyq standarttarǵa barynsha jaqyndaı túskenin, «100 naqty qadam» Ult josparynyń aıasynda sot júıesi aıtarlyqtaı jańǵyrtylǵanyn atap ótti. «Memleket basshysy osy máse­lege erekshe kóńil bólip kele­di, ol bıznes sýbektilerin, ınves­tor­lardyń quqyqtaryn qorǵaý jáne olar­dyń tıimdi qyzmet atqarýyna ońtaı­ly jaǵdaı jasaýda sot júıesiniń aıryqsha rólin árqashan nazarda ustap keledi», dedi Aıgúl hanym. Jıyn barysynda qatysý­shy­lar sot isin júrgizýdi jeńi­lde­tý­ge, sot tóreligine qoljetimdi­lik­ti keńeı­týge jáne kásipker­lik­ti qol­daý úshin barynsha tıimdi jaǵdaı jasaýǵa baǵyt­tal­ǵan jumystar júıeli túrde júrgizilip kele jatqanyn, eń negizgi jańashyldyqtyń biri – ınves­tısııalyq daýlar boıynsha der­bes sot alqasynyń qurylǵanyna toqtaldy. Sot satylaryn qys­qar­typ, apellıasııalyq jáne kassa­sııa­lyq satydaǵy sýdıalardyń jaýapkershiligin arttyrý arqyly ınvestorlardyń quqyqtary men zańdy múddelerin sapaly quqyq­tyq túrde qorǵaýdy basty nazarǵa alý máselesi de tilge tıek etildi. Osy basqosýdaǵy zańdy tul­ǵa­lar keltirgen derekterge súıensek, 2016 jyldyń basynan bas­tap qoldanysqa engizilgen jańa Aza­mat­tyq prosestik kodeks zańdy múddelerdi qorǵaý men qalpyna keltirý isterin birshama ilgeri jyljytýǵa sebepshi bolǵan eken. Atalmysh kodekstegi jańashyl baǵyttar sottar jumysynyń tıimdi bolýyna yqpal etken. Sot tóreliginiń eski júıesinde keıbir sanattaǵy ister jarty jylǵa deıin qaralyp kelse, búginde olar eń kóp degende 8 aıdyń ishinde sheshimin taba bastaǵan. Azamattyq isterdiń 82 paıyzdan astamy bir ǵana sot otyrysynda, 10 paıyzǵa jýyǵy eki, al 59 paıyzy jeńildetilgen is júr­gizý tártibinde, ıaǵnı sottarǵa mıl­lıon­ǵa jýyq proseske qatysý­shy­lardy shaqyrmaı-aq qaralatyn bolǵan. Joǵarǵy sottyń sýdıasy Gúl­jan Álmaǵambetova óz sózinde qaty­sýshylardyń nazaryn kásip­kerlik úshin jaǵdaılardy jaqsar­týǵa baǵyttalǵan azamattyq pro­sestik zańnamanyń jańa­shyl baǵyt­taryna aýdardy. «Azamat­tyq prosestik kodekske ózgeris­ter engizý azamattyq ister bo­ıyn­sha sot tóreligin júzege asy­rýdan quralatyn mindetter men prınsıpterden taraıtyn prosestik zańnamanyń mazmuny­na qoıylatyn halyqaralyq standarttardyń talaptaryna saı keledi», – dedi. Sonymen qatar, Joǵarǵy sot sýdıasy Memleket basshysy jýyr­da ǵana azamattyq, prosestik jáne banktik zańnamany jetil­dirý maqsatynda «Qazaqstan Respýblı­kasynyń keıbir zańnamalyq akti­lerine azamattyq, banktik zańna­many jetildirý jáne kásipker­lik qyzmet úshin jaǵdaıdy jaqsartý máse­leleri boıynsha ózgerister men tolyq­tyrýlar engizý týraly» Qazaq­­stan Respýblıkasynyń Zańy­­na qol qoıǵandyǵyn málim­dedi. Osy zańǵa engizilgen túzetý­lerge sáıkes, jaýapkerge jáne úshin­shi tulǵalarǵa talap qoıý ary­zy­nyń kóshir­melerin jáne oǵan  qosa beril­gen qujattardy úsh jumys kúni ishinde joldaý neme­se tap­syrý mindeti sotqa júk­te­letin bolǵan. Al buryn mundaı mindet talap qoıý­shylarǵa júktelgen edi. Aryz­dy elektrondy qujat túrinde bergen jaǵdaıda endi onyń kóshirmesin qosa berý qajettiligi bolmaıdy. Sonymen qatar, jaýap­ker­lerdiń talap aryzǵa pikir berý merzimi talap aryzdyń kóshirmesin alǵan kúnnen bastap 10 jumys kúnine deıin qysqartylǵan. Buǵan qosa, isti sot talqylaýyna daıyndaý aıaqtalǵan kúnnen bastap 10 jumys kúninen keshiktirmeı bastalatyn birinshi sot tyńdaýynyń merzimi zańnamalyq turǵyda bekitilgen. Buǵan deıin mundaı merzim zań bo­ıynsha múldem anyqtalmaǵan. Dóńgelek ústel sheńberinde, sondaı-aq, «Baker & McKenzie» kompanııasynyń aǵa zańgeri Alek­sandr Korobeınıkov, «Atameken» UKP Arbıtraj ortalyǵynyń at­qarýshy dırektory Asqar Qal­dybaev, basqarýshy dırektor – «Atameken» UKP Zańnama jáne ózin-ózi retteýdi damytý depar­ta­­ment­iniń dırektory Aıjan Bı­­janova, Almaty qalasynyń ma­man­dandyrylǵan aýdanaralyq ekonomıkalyq sotynyń sýdıasy Ǵalııa Ońlabekova, Almaty qalasy ádilet departamentiniń basshysy Gúl­nara Kókebaeva jáne birqatar zań­gerler men sot qyzmetkerleri sóz sóı­lep, óz pikir-túıinderimen bólisti. Mıra BAIBEK, «Egemen Qazaqstan» ALMATY