«Sportshy» – meniń ekinshi esimim!»

Osy kúni Pavlodardyń dańqyń asyryp júrgen tańdaýly sportshylardyń qatarynda Darıa Ýsanovanyń shoqtyǵy bıik. Shańǵysyn saılap, vıntovkasyn maılap, el namysy synǵa túser dodanyń tórinen tabylatyn jerlesimiz – oblystyń maqtanyshy. 2017 jyl D.Ýsanova úshin sátti órilýde. Aldymen Al­matyda ótken qysqy Ýnıver­sıadada kúmispen kúptelgen (aralas estafeta) ol, stýdentter oıynynan keıin ile jalaýyn jelbiretken qysqy Azıadada (Sapporo, Japonııa) altyn (aralas estafeta) men qola (iz kesý, 10 shaqyrym) medal enshiledi. Búginde ol Álem kýbogy kezeńderine qatysýda. Bıatlonnan Qazaqstan Ulttyq quramasynyń bel­di múshesi D.Ýsanova áýel­­­de jeńil atletıkamen aı­nalysqan. Ony bul sek­sııaǵa ápkesi Nastıa ertip aparypty. Keıin jeńil atletıkadan oblys quramasyna alynǵan. Nátıjesi de táp-táýir bolypty. Tek, keıin taǵy da ápkesi Nastıanyń úgit­teýimen shańǵy sportyna bet burǵan. «Qystygúni shańǵy tebýge baratynbyz. Ásheıin, áýestik úshin. Jazda jeńil atletıka, qysta shańǵyny serik ettim. Sóıte tura, shańǵy jarysynan oblystyq jarystarǵa qatysyp júrdim. Keıin Qazaq­stan chempıonatynda baq synaıtyn sportshylardyń qataryna qosyldym. Alaı­da, kórsetkishim tómen bol­ǵandyqtan, jeńil atletıkaǵa kóńil bólgenim durys dep sheshtim. Biraq, kóp uzamaı ápkemniń aqyl-keńesimen shańǵy sportyna oraldym», deıdi Darıa Ýsanova. 2009 jyly Darıaǵa bıatlonnan óner kórsetý týraly usynys túsedi. Osylaısha, ol sporttyń atalǵan túrin meńgere bastaıdy. Jarys saıyn nátıjesi de jaqsara berdi. Ýsanova sol sátten bas­tap aıaýly anasyn utyp alǵan me­­daldarymen qýantyp keledi. «Sonda ǵana meniń ómirim bıatlon ekenin uqtym. Osy ýaqytqa deıin sportty basqa salaǵa aýystyrý týraly esh oılaǵan emespin. Sebebi, «Sportshy» – meniń ekinshi esimim», deıdi ol. D.Ýsanova – qysqy Olım­pıadaǵa qatysqan sanaýly pavlodarlyq sportshylardyń biri. Ol 2014 jyly Reseıdiń Sochı qalasynda ótken Olım­pııa oıyndarynda óner kór­setti. Dál osy jyly Alma­tyda uıymdastyrylǵan Azııa chempıonatynda kúmis júl­dege (mass-start) qol jet­kizdi. Darıa – bıatlonnan ha­lyq­aralyq dárejedegi sport sheberi. Erkebulan QYZDARBEK, jýrnalıst PAVLODAR