Búgin Astanada ıslamdyq qarjylandyrý týraly forým ótti

Búgin «Astana» halyqaralyq qarjy Ortalyǵy (AHQO) men REDmoney Group birlesip uıymdastyrýymen IFN TMD Forýmy ótti. Forýmnyń negizgi maqsaty – TMD elderindegi ıslamdyq qarjylandyrýdyń damýyna, aımaqtaǵy ınvestısııalyq múmkindikterdi zertteýge yqpal etý, sonymen qatar qatysýshylarǵa ózara baılanys quryp, seriktestik qarym-qatynastardy bekitýge múmkindik berý. Forýmda AHQO Basqarýshysy Q.Kelimbetov, Katar Ulttyq Banki Tóraǵasy Sheıh Abdýlla Bın Saýd Al-Tanı, Jeke sektordy damytý jónindegi Islam korporasııasynyń basshysy Halıd Al-Abýdı, Masraf Al Rayan Dırektorlar Keńesiniń Tóraǵasy Hýsseın Alı Al Abdýlla, Katar Qarjylyq Ortalyǵynyń Tóraǵasy Maıkl Raıan, Qyrǵyz Qor Bırjasy Basqarma Tóraǵasy A. Sýltanov, Qatar Investment Authority Katar Investısııalyq Qorynyń bıznesti damytý departamentiniń dırektory  Sheıh Abdýlazız ben Alı Al-Tanı, Reseı Banki Tóraǵasy Keńesshisi A.Sımanovskıı, Qazaqstan Damý Banki Tóraǵasy B.Jámishev, Nomura Asset Management Bas dırektory Ramlıe Kamsarı, Amundi Islamic Atqarýshy dırektory Arsad Sınýýn, Nastaq Dubai bıznesti damytý Tóraǵasy Tahır Mahmýd, Tatarstan Respýblıkasy ınvestısııalyq damý Agenttigi, Bahrain Institute of Banking and Finance, Finance Accreditaion Agency ókilderi jáne t.b. qatysty. AHQO Basqarýshysy Qaırat Kelimbetov, ıslamdyq qarjylandyrý AHQO jumysyndaǵy bes negizgi baǵyttyń biri, qazirgi kúni osy baǵytta ıslam qarjylandyrýy ınstıtýttaryna quqyqtyq jáne regýlıatorlyq qolaıly jaǵdaı jasaý úshin jumys júrgizilip jatqandyǵyn aıtty. Jeke sektordy damytý jónindegi Islam korporasııasynyń basshysy Halıd Al-Abýdı ıslam qarjylandyrýynyń TMD-gi myqty áleýetine toqtalyp, ıslam qarjylandyrýynyń  ınfraqurylymdyq jobalardy qarjylandyrýdy ártaraptandyrýǵa múmkindik beretinin aıtty. Onyń aıtýynsha, ıslam mıkronesıeleýi kedeıshilikten arylýǵa áser etetin negizgi quraldardyń biri. Forým kezindegi «TMD-degi ıslam qarjysy damýy jolyndaǵy kedergilerdi eńserý» sessııasy kezinde dısskýssııanyń qatysýshylary aımaqtaǵy ıslam qarjylandyrýynyń ósimine baǵyttalǵan óz usynystaryn aıtty. «Islam qarjylandyrýy alǵysharttaryna sáıkes kapıtaldy tartý arqyly aımaqtyq damýǵa yqpal etý» atty sessııa kezinde TMD elderi orta jáne shaǵyn bıznes ókilderi ıslam qarjysyn tartý boıynsha qandaı tıimdilikke qol jetkize alady, munaı-gaz, energetıka, aýyl sharýashylyǵy, halal ındýstrııa salalary boıynsha aımaqtyq resýstardyń damýyna ıslam qarjysynyń qandaılyqty áseri bolatyny týraly talqylady. Forým kezinde Aımaqtyq qarjylyq retteýshiler kezdesýi ótip, onda qatysýshylar quqyqtyq jáne normatıvtik baza damýy máselelerin qarastyrdy. Sarapshylar, sonymen qatar, ıslam qarjylandyrýynyń ósimin qamtamasyz etetin qosymsha is-sharalardyń qabyldanýy múmkindigin de aıtty.