Bul jolǵy is-shara Erte aralasý ortalyǵynyń múmkindikterine arnaldy. Balalarǵa qaı jastan bastap kómek kórsetiletini, súıemeldeý kimge qolaıly ekeni jáne jumystyń nátıjesi qalaı baǵalanatyny týraly Erte aralasý áleýmettik qyzmetter ortalyǵynyń dırektory Nurzııa Álimbekova aıtyp berdi.
Ortalyqta balalardyń damýyna keri áser etetin faktorlardy erte kezeńde anyqtap, otbasyna keshendi qoldaý kórsetý, balalardyń áleýmettik ári bilim beretin ortaǵa tez sińisip ketýine jaǵdaı jasalǵan. Nátıjesinde 167 balaǵa jáne otbasyna kómek kórsetilgen.
Bala kútimine baılanysty járdemaqy: Qańtar aıynda qansha teńge tólendi?
Ortalyqqa júgingen balalardyń 82 paıyzynyń damýy qıyndyq týǵyzsa, 33 paıyzynda qalypty dınamıka baıqalǵan. Al 21 paıyzyna arnaıy qyzmet kórsetilip, mektepke deıingi bilim berý uıymdaryna barýǵa daıyndyqtan ótti.
«Erte aralasý jobasyn áleýmettik qoldaýdyń turaqty júıesi retinde qarastyryp otyrmyz. Onyń aıasynda qyzmet jelisin keńeıtip, kadrlyq áleýetti arttyra otyryp, qyzmet sapasyn arttyra túsetin bolamyz. Aldaǵy ýaqytta qyzmetter jelisin keńeıtý men kadrlyq áleýetti ulǵaıtý josparlanyp otyr. Bıylǵy sáýir aıyna qaraı rtalyqtaǵy mamandardyń sany 26-ǵa jetedi. Erte kómek beretin baǵdarlamalar boıynsha jumys istelip, damý dınamıkasyna úzbeı baqylaý jasaldy. Sóıleý men kommýnıkasııany damytý, qımyl-qozǵalys, tanymdyq belsendilik, óz-ózine qyzmet kórsetý daǵdysyn qalyptastyrý boıynsha qyzmet kórsetilip, sondaı-aq ata-analarǵa psıhologııalyq keńes berip, balalardyń áleýmettenýine barynsha jaǵdaı jasaýǵa tyrysady», dedi spıker.
Onyń aıtýynsha, bala týa salysymen ortalyqtyń qyzmetin ala alady. Negizinen úsh jasqa deıingi balalardy qabyldaǵanymen, keıde otbasy men bala qajettiligine qaraı jeti jasqa deıin súıemeldenýi múmkin. Mamandardyń pikirinshe, erterek júginse balanyń damýyn ýaqtyly qoldap, aldaǵy qıyndyqtyń aldyn alýǵa múmkindik bolady.
Ortalyq jumysynyń mańyzdy ereksheligi – medısınalyq dıagnozdyń bolýy mindetti emes. Eger balanyń minez-qulqy men júris-turysynda ata-anasyn alańdatarlyqtaı bir jaǵdaılar bolyp jatsa, resmı mamandardyń aldyna barmaı-aq, olar osy jerden-aq kerekti keńes pen qoldaý ala alady.
Múmkindigi shekteýli balalarǵa – erekshe nazar
«Keıde ata-anasy bir nárseniń durys emes ekenin ishteı sezedi, sonyń ózi bizge júginýge jetkilikti. Ol ne bolǵanyn túsinip, jaǵdaı ýshyǵyp ketpeı turyp qoldaý kórsetýge kómektesedi. Ortalyqtaǵy kómek damytý ortalyqtaryndaǵy sabaq pen medısınalyq kómekten ózgeshe. Munda mamandar balaǵa ǵana emes, ata-anasyna da kóńil bólip, jumys isteıdi. Usynystardy kúndelikti ómirge engizýge kómektesedi. Bul bir rettik sabaq emes, júıeli túrde súıemeldeý. Otbasynyń kúndelikti ómirinde osyndaı keńesterge arqa súıegeni bizge óte mańyzdy. Onyń tıimdiligin formaldy kórsetkishtermen emes, ata-analardyń ózderi baıqap otyrǵan ózgerister arqyly baǵalaımyz. Balaǵa qarym-qatynas jasaý jeńildeıdi sonda, jańa daǵdy qalyptasady, eresekter jaǵy da burynǵydaı alańdaı bergenin qoıady», deıdi spıker.
Ortalyq mamandary jumysyn otbasy múshelerimen birlesip talqylap otyrady. Qajet bolǵan jaǵdaıda kómek kórsetý formaty túzetilip, súıemeldeý bala men onyń jaqyndarynyń suranysyna qaraı ózgertiledi.
