Qazaqstannyń eńbek sińirgen qaıratkeri Alma Kákishevanyń rejısserligimen kórermenderimen qaýyshqan jańa qoıylym ónersúıer qaýymnyń ystyq yqylasyna bólendi. Dramanyń avtory – Mádına Omarova. Atalǵan spektakl Uly Otan soǵysy jyldary tylda qalǵan halyqtyń basyndaǵy aýyr haldi sýretteıdi. Alapat maıdan eldegi er-azamatty túgel sypyryp alyp ketkende, barlyq qııamet-qıynshylyq aýylda qalǵan shal-kempir, bala-shaǵa men áıelderdiń moınyna qyl shylbyr bolyp ilindi. Sol bir kez taǵy bir sumdyǵymen tarıhta qaldy. Ol – keńes ókimetiniń saıasatyna qaıshy bolyp kóringen ulttardy týǵan jerinen aıyryp, basqa mekenge deportasııalaý bolatyn. Qýǵyn-súrginge ushyraǵan ult ókilderi qazaq aýyldaryna keldi.
Qoıylymǵa arqaý bolǵan negizgi taqyryp osy. El men eldiń, ult pen ulttyń baýyrlasý prosesi, ultymyzdyń qonaqjaılylyǵy keń mazmunda kórinis tapqan. Týyndyda qazaqtyń ózi qaıǵydan qan jutyp, ash-jalańash otyrsa da, pana izdep kelgen jurtty syrtqa teppeı, aıaly alaqanyn qalaı usynǵany baıandalady. Soǵys jyldary halyqtyń basyna túsken náýbet, kúshtiniń álsizge kórsetken óktemdigi, qarapaıym aýyl adamdarynyń tirshiligi, búkpesiz de boıamasyz qalpynda berilgen.
Spektakldegi negizgi keıipkerlerdi Baýyrjan Qaptaǵaı, Omar Qıqymov, Danagúl Temirsultanova, Baqtııar Qoja, Gúlnár Jaqypova, Ǵaınıkamal Baıqoshqarova jáne taǵy da basqa teatrdyń tanymal ártisteri somdady. Teatr synshylary qoıylymǵa jaqsy degen baǵa berdi «Tórt birdeı ulynan aıyrylǵan Aǵıranyń «Qaraly qaǵaz maǵan bala bola ma?» degen sózi soǵys kezindegi analardyń beınesin kóz aldyma ákeldi. Qoıylymdaǵy aýylbasynyń áıeli bolyp oınaǵan Nurjan Beksultanovany erekshe atap ketkim keledi. Halyqty jylata da, kúldire de bildi», deıdi teatrdyń turaqty kórermeni Jasulan Naýryzalıev.
О́ner dese isher asyn jerge qoıatyn kórermen qaýymdy tánti etken jańa qoıylym halyqtyń iltıpatyna bólene beredi degen senimdemiz.
Arman OKTIаBR, «Egemen qazaqstan»
ALMATY
