Jyr padıshasy – Mańǵystaýda

Kórnekti aqyn,  Qazaqstannyń halyq jazýshysy, memlekettik syılyqtyń laýreaty Farıza Ońǵarsynova oblys ákimi Qyrymbek Kósherbaevtyń arnaıy shaqyrýymen Mańǵystaý aımaǵynda boldy. Mańǵystaýda kimim bar osy meniń? Alady onda bizderdi esine kim? Qýattansam dep edim, topyraǵynan Shyǵar ma eken aldymnan tosyp elim?   Oǵylandyny túsimde kórem keıde, Sonda qaıǵy-muńymdy óshiremin. Pir babamyz dem berip jatyr-aý dep Aq boz atqa mingendeı kósilemin...   Kelmeı júrsem bul jaqqa tózim jylap, Júregim de súıreıdi, kózim bulap. Mańǵystaýda patshadaı sezinemin, Nege ekenin bilmeımin ózim biraq.   Mine, osylaı dep Mańǵystaýyn jyrǵa qosatyn azamat aqyndy aımaq basshylary, óner-mádenıet ókilderi áýejaıda taǵatsyzdana tosyp, alqyzyl gúldermen, án-jyrmen qýana qarsy aldy. Aımaq­taǵy alǵashqy qadam shapaǵatty Shopan ata arqyly el ıesi, jer kıesi Pir Beket atanyń máńgi damyl­daǵan Oǵylandy jer asty ǵımaratyna baryp zııarat etýden bastaldy. Shalǵaıdaǵy Tushyqudyq aýylyndaǵy kezdesýde: Qumy – mamyq bul jerdiń, sýy baldaı, Júr bireýler kıesin uǵyna almaı. Balqaımaǵyn, shubatyn tosyp aldan, Barsań bári kútedi dymy qalmaı. Sonda sende sezesiń Mańǵystaýdyń Shyńy qandaı, shyń tektes uly qandaı - dep jyr tókti aqıyq aqyn. Qazynaly túbektiń túp qazyǵy Fort-Shevchenko qalasynda, Aqtaýdaǵy Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetindegi stýdent-jastarmen kezdesýler de ásem, áserli boldy. Qaıratker aqyn aımaqtaǵy tarıhı oryndar, tabıǵaty kórikti jerler men ór­kendi ózgeristerdi de nazardan tys qaldyrmady. Al keshe oblys ortalyǵynda «О́leń, men seni aıalap ótem...» atty poezııa keshine jınalǵandar Máde­nı­et saraıyna syımaı ketti. Alǵashqy sóz alǵan halyq jazýshysy, Qazaqstannyń Eńbek Eri Ábish Kekilbaıuly: Farıza Mańǵystaýdyń kıeli topyra­ǵynan qýat alǵan jyr padıshasy, qazaq poezııa­sy­nyń túndigin jelpildetip turǵan tulǵa. Farızamen birge júrip, ómir keship, qurdas qylǵan taǵdyrǵa dán rızamyn – dep tebirene, tolǵaı sóılep, «Sizderdi qatty saǵynyp kelip edi. El de solaı eken, tóbelerine kóterýde», – dep jınalǵandarǵa rıza­shy­lyq sezimin jetkizdi. Oblys basshysy Qyrym­bek Kósherbaev «Bul bir ólkemizge erekshe nur tógilgen kúnder bolyp tur. Aısáýle anamyz «qos qulynym» dep erkeletken ádebıetimizdiń qos alybynyń aımaǵymyzǵa atbasyn tireýi bizder úshin úlken qýanysh. Jyr alaýyn jalyndata berińiz. Jan jadyratar jaýhar jyrlaryńyz kóp bolsyn, Farıza apaı!», degen ıgi tilegin aıtyp, aqynǵa ulttyq dástúrmen ıyǵyna qazaqy kamzol jaýyp, temir tulpardyń kiltin tapsyrdy. Bul keshte ólkeniń aıtýly ónerpazdary R.Aıdarbaeva, T.Asar, E.Qulıev, J.Kóshkinov, A.Erim­be­tova, A.Kósherov Farıza apaıdyń sózine jazyl­ǵan, aqynǵa arnalyp shyǵarylǵan ánder men kúı­ler­di naqyshyna keltirip oryndasa, aıtýly aıtys aqyny M.Qosymbaev óz arnaýyn, aqyndar Á.Bımaǵanbetov, R.Qosbarmaqov, S.Shortanova, «Janartaý» jas aqyndar klýbynyń músheleri, mektep oqýshylary aqynnyń shyǵarmalarymen óz týyn­dylaryn oqydy. Jınalǵandar aqynnyń ózi oqyǵan Mańǵystaý týraly jazylǵan jańa jyrlaryn jyly qabyldap, qol soǵyp qoshemet kórsetti. Jyrsúıer qaýym qushaq-qushaq alqyzyl gúl syılap, azamattyq áýenge toly asqaq jyrlary úshin aqynǵa alǵys sezimderin bildirdi. Syı-qurmette shek bolmady. Qysqasy, mańǵystaýlyqtar úshin jyr patshaıymy atanǵan Farıza Ońǵarsynovanyń óleńderin tyń­dap, onymen emen-jarqyn áńgimelesý aımaǵymyz­dyń mádenı-rýhanı ómirindegi erekshe este qalatyn oqıǵa boldy. О́nersúıer qaýym bir jelpinip, bir serpilip qalysty. Jolaman BOShALAQ. Mańǵystaý oblysy.