Rásimge Qazaqstannyń Ulybrıtanııadaǵy elshisi Erlan Ydyrysov, Birikken Koroldiktiń Saýda jáne ınvestısııalar memlekettik mınıstri Greg Hends, Ulybrıtanııanyń EKSPO-2017 Ulttyq komıssary Charlz Hendrı, pavılonnyń bas dızaıneri Asıf Han, sondaı-aq, brıtan úkimetiniń jáne parlamentiniń, iskerlik jáne sarapshy toptarynyń ókilderi qatysty.
Ulybrıtanııa – óziniń EKSPO-2017 kórmesine qatysýyn alǵashqylardyń qatarynda rastap, Ulttyq komıssaryn taǵaıyndaǵan jáne óz pavılony dızaınynyń tusaýkeserin ótkizgen elderdiń biri. Birikken Koroldiktiń bul jahandyq forýmǵa qatysýy onyń Qazaqstanmen uzaq merzimdi seriktestik qurýǵa jáne ony damytýǵa beıildiliginiń aıǵaǵy.
E.Ydyrysov Qazaqstannyń mundaı halyqaralyq kórmeni ótkizetin Orta Azııadaǵy jáne TMD-daǵy tuńǵysh memleket bolatyndyǵyn atap ótti. Onyń aıtýynsha, EKSPO-2017 bizdiń elimiz úshin tarıhtaǵy asa mańyzdy jahandyq forýmdardyń biri bolady.
О́z kezeginde Birikken Koroldiktiń Saýda jáne ınvestısııalar memlekettik mınıstri, Qazaqstan-Ulybrıtanııa ÚAK teń tóraǵasy G.Hends eki el arasyndaǵy qatynastardyń joǵary deńgeıde damyp kele jatqandyǵyna basa nazar aýdaryp, is-sharaǵa qatysýshylardy osy jylǵy 13-16 sáýirde London alańdarynyń birinde ótetin Qazaqstannyń «Kerýen-EKSPO-2017» roýdshoýyna qatysýǵa shaqyrdy.
Sonymen birge, Ulybrıtanııanyń EKSPO-2017 Ulttyq komıssary Ch.Hendrı de brıtan tarapy úshin bul kórme Qazaqstanmen jáne kórmege qatysýshy ózge eldermen bıznes salasyndaǵy yntymaqtastyqty damytýǵa arnalǵan aıryqsha múmkindik ekendigin tilge tıek etti.
EKSPO-2017 kórmesindegi brıtandyq pavılonnyń taqyryby – «Biz – energııamyz». Bas dızaıner Asıf Hannyń sheshimi boıynsha brıtandyq pavılon qazaqtyń kıiz úıi pishindes bolatyn kórinedi.
