Kesh «Seń qozǵaldy... qaljyńnyń qorjynyn aqtaryńdar!» dep ataldy. Sahnada eń aldymen I. Ilf pen E. Petrovtyń «12 oryndyq» shyǵarmasy oryndaldy. Ostap Benderdiń dál búgingi kúndegi keıbir adamdarmen tirligi óte uqsas ekendigin ańǵartqan astarly oıdyń ıesi pedagog-mýzykant Tımýr Áýbákirovtiń ázil-qaljyńy kópshiliktiń kóńilinen shyqty. «Biz problemasy kóp bolsa da, sharshamaıtyn qarapaıym S. qalasynda turamyz», dep qaljyńdaǵan Tımýr Ostap Bender kınofılminen naqyshyna keltire ánder oryndady. 12 oryndyq sahnaǵa qoıylyp, «sonyń ishinde jasyrynǵan aqsha bar» degendi izdegen kórermenderdiń biri 1000 teńgeni olardan emes, ózi otyrǵan oryndyqtyń astynan taýyp alǵanda tań-tamasha qaldy. Taǵy da basqa sáttilikke tap bolǵandar tapqan myń teńgelerin «Kilt» klýbynyń damýyna dep arnady. Keshke qatysýshylar túrli konkýrstarǵa qatysyp, eń bastysy, ázil-qaljyńmen kóńilderin kóterip, kózderinen jas aqqansha bir kúldi. Osynyń bári kúlki kúnine arnaldy.
Raýshan NUǴMANBEKOVA
SEMEI
Sýretti túsirgen avtor
