Nursultan Nazarbaev kezdesýge qatysýshylardy quttyqtap, bul is-sharanyń bıyl maýsymda Astanada bolatyn Shanhaı yntymaqtastyq uıymynyń sammıti qarsańynda ótýiniń mańyzdylyǵyna toqtaldy.
– Biz Sankt-Peterbýrgtegi oqıǵaǵa baılanysty búkil Reseı halqyna kóńil aıtamyz. Bul terrorızm men ekstremızmniń shekara degendi bilmeıtinin kórsetedi, syn-qater men qaýip azaımaı tur. Osyǵan baılanysty memleketter basshylary Qaýipsizdik keńesteri hatshylarynyń qyzmetine erekshe mán berip otyr, – dedi Memleket basshysy.
Qazaqstan Prezıdenti Shanhaı yntymaqtastyq uıymynyń qazirgi yntymaqtastyq tetikteri men normatıvtik quqyqtyq bazasyn nyǵaıtý isiniń mańyzdylyǵyna qatysýshylar nazaryn aýdardy.
Sondaı-aq, Nursultan Nazarbaev Shanhaı yntymaqtastyq uıymyna qatysýshy elderdiń ekonomıkalyq jáne saıası baılanystardy nyǵaıtý jolynda atqarǵan jumystaryna oń baǵa berdi.
Budan bólek, Memleket basshysy uıym aldynda turǵan mindetterge erekshe toqtaldy.
– Bul – qatysýshy elderdiń barlyq baǵyt boıynsha kelisilgen is-qımyly. Qazirgi ýaqytta Shanhaı yntymaqtastyq uıymynyń ekstremızmge qarsy áreket etý jónindegi konvensııa men Shanhaı yntymaqtastyq uıymynyń halyqaralyq terrorızmge qarsy birlesken is-qımyl jónindegi málimdemesi qaralýda. Bul qujattardy qysqa merzim ishinde maquldaý qajet, – dedi Qazaqstan Prezıdenti.
Nursultan Nazarbaev Shanhaı yntymaqtastyq uıymynyń Astanadaǵy sammıtinde Úndistan men Pákistandy uıymnyń tolyqqandy múshesi retinde qabyldaý josparlanyp otyrǵanyn jáne onyń Azııadaǵy yntymaqtastyqty nyǵaıtýǵa qosymsha tyń serpin beretinin aıtty.
– Shanhaı yntymaqtastyq uıymynyń Birikken Ulttar Uıymy, Ujymdyq qaýipsizdik týraly shart uıymy, Azııadaǵy ózara is-qımyl jáne senim sharalary jónindegi keńes sııaqty halyqaralyq jáne óńirlik qurylymdarmen yntymaqtastyǵy aıasyn keńeıtý qajet. Bul osy uıymdy odan ári damytýǵa yqpal etedi dep oılaımyz, – dedi Qazaqstan Prezıdenti.
Memleket basshysy Qazaqstannyń 2017-2018 jyldar kezeńindegi BUU Qaýipsizdik Keńesiniń turaqty emes múshesi retinde halyqaralyq beıbitshilik pen qaýipsizdikti nyǵaıtýǵa eleýli úles qosyp otyrǵanyn aıtty. Máselen, Sırııadaǵy daǵdarysty saıası retteý isine kúsh-jiger jumsalyp jatqany aıtylýda.
Kezdesýge Qazaqstannyń, Qyrǵyzstannyń, Reseıdiń, Tájikstannyń Qaýipsizdik keńesteriniń hatshylary – V.Jumaqanov, T.Djýmakadyrov, N.Patrýshev, A.Kaharov, Qytaı Halyq Respýblıkasynyń Qoǵamdyq qaýipsizdik mınıstri – Memlekettik keńes múshesi Go Shenkýn, Shanhaı yntymaqtastyq uıymynyń Bas hatshysy R.Alımov, Shanhaı yntymaqtastyq uıymy О́ńirlik antıterrorlyq qurylymynyń atqarýshy komıtetiniń dırektory E.Sysoev qatysty.
Qaýipsizdik keńesteriniń Astanadaǵy is-sharasy Qazaqstannyń Shanhaı yntymaqtastyq uıymyna tóraǵalyǵy aıasynda ótkizilýde. Ol Shanhaı yntymaqtastyq uıymyna múshe memleketter basshylarynyń bıylǵy maýsymǵa josparlanǵan keńesine daıyndyqtyń mańyzdy kezeńi bolyp sanalady.
