Astanada jarty ǵasyrdan astam ýaqytta elimizdiń agroóndiristik kesheni úshin 60 myńnan astam biliktiligi joǵary mamandar daıyndap shyǵarǵan S.Seıfýllın atyndaǵy Qazaq agrotehnıkalyq ýnıversıtetinde jańadan salynǵan Stýdentter úıi ashyldy. Saltanatty is-sharaǵa Bilim jáne ǵylym vıse-mınıstri Elmıra Suhanberdıeva, Aýyl sharýashylyǵy mınıstrliginiń jaýapty hatshysy Ermek Kósherbaev, Parlament Senatynyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Sergeı Plotnıkov, Astana qalasy ákiminiń orynbasary Ermek Amanshaev jáne belgili qoǵam qaıratkerleri, ustazdar men stýdentter qatysty.
Jıynda sóz alǵan S.Seıfýllın atyndaǵy QazATÝ rektory Aqylbek Kúrishbaevtyń aıtýynsha, Stýdentter úıi sońǵy 40 jylda jańadan salynyp otyrǵan ǵımarat.
«Byltyr jas mamandarǵa, magıstranttar men doktoranttarǵa Esil ózeniniń sol jaǵalaýynan 120 páterli úsh úıdi paıdalanýǵa bergen bolatynbyz. Sóıtip, barlyq oqytýshylardy jataqxanamen qamtamasyz ettik. Búgin kópten kútken qýanyshty sát – jańa Stýdentter úıi ashylyp otyr. Sońǵy jataqhana keńes kezinde, osydan 40 jyl buryn salynǵan edi. Jataqhana qurylysyna memleket bıýdjetinen 1 mlrd teńge aqsha bólindi. Búginde ýnıversıtet stýdentteriniń 75 paıyzy jatyn orynmen qamtamasyz etilip otyr», dedi rektor.
Jataqhana negizinen shalǵaıdan kelgen stýdentterge beriledi. Ýnıversıtettiń 1-kýrs stýdenti, ereımentaýlyq Mádına Ánýarbekqyzy Stýdentter úıinen bólme alǵanyna qýanyshty ekenin, bar jaǵdaı jasalǵanyn jetkizdi.
Jataqhanada 592 jatyn oryn qarastyrylǵan. 9 qabatty Stýdentter úıinde qazirgi zamanǵy telekommýnıkasııa jelisi, joǵary jyldamdyqtaǵy Wi-Fi jelisi, jastar ortalyǵy, kitapxana, dárigerlik beket, asxana, sport zaly, shaxmat pen toǵyzqumalaq jáne kir jýý bólmesi bar.
Aıa О́mirtaı,
«Egemen Qazaqstan»
Sýretterdi túsirgen Erlan Omarov,
«Egemen Qazaqstan»
