Parlament Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev bastaǵan májilismender aldymen «Beıbitshilik jolyndaǵy seriktestik» oqytý ortalyǵynda bolyp, «Bitimgershilik kontıngentti daıyndaý jáne «Qazaqstan Respýblıkasynyń bitimgershilik is-sharalary týraly» Zańnyń iske asyrylý barysy» taqyryby boıynsha otyrys ótkizdi. Májilis depýtattary, Qorǵanys mınıstrliginiń basshylyq quramy ókilderi qatysqan bul kóshpeli otyrys Qarýly Kúshterdiń 25 jyldyǵy qarsańynda ótkizilgenin aıta ketý kerek.
Alqaly jıynda elimizdiń 2017-2018 jyldardaǵy BUU Qaýipsizdik Keńesiniń músheligindegi basymdyqtary men bitimgershilik maqsatta atqarylyp jatqan jumystar tóńireginde áńgime órbidi. Áskerı medısına, mınadan tazartý jáne radıasııalyq, hımııalyq jáne bıologııalyq qorǵanys ortalyqtarynyń komandırleri Rýslan Iseev, Rafık Ajgalıev, Baqyt Abdýllaev arnaıy baıandama jasap, qarapaıym halyqqa gýmanıtarlyq kómek kórsetý, soǵys alańdaryn mınadan tazartý sııaqty soǵys jaǵdaıyndaǵy taktıkalyq is-qımyldar, sondaı-aq, áskerı qyzmetkerlerge shet tilderin qarqyndy ári jedel oqytý ádis-tásilderimen tanystyrdy. Depýtattar tarapynan naqty suraqtar qoıylyp, birqatar usynystar aıtyldy.
Budan keıin Desanttyq-shabýyldaýshy áskerleriniń quramyna kiretin «Qazbat-1», «Qazbat-2», «Qazbat-3» atalatyn úsh batalonnan turatyn «Qazbrıg» Qazaqstan bitimgershilik brıgadasynyń jeke quramy tanystyryldy. Depýtattar 61993 áskerı bólimshesine baryp, zamanaýı qarý-jaraq, tehnıkalyq baza, áskerlerdiń taktıkalyq daıyndyǵy jáne áskerı bólimniń jalpy jaǵdaıymen tanysty.
Qorǵanys mınıstriniń orynbasary Talǵat Muhtarovtyń aıtýynsha, qaqtyǵystan zardap shekken, kómek pen qoldaýǵa muqtaj memleketterge beıbit maqsatta qolushyn sozý úshin arnaıy qurylǵan Bitimgerlik batalony jyl saıyn halyqaralyq jattyǵýlarǵa qatysady. Máselen, ótken jyly Germanııada, Ulybrıtanııada ótken jattyǵýlarda áleýetin synap, joǵarǵy baǵaǵa ıe bolǵan. Teorııalyq jáne praktıkalyq daıyndyǵy kúnnen kúnge ósip kele jatqan batalon qajetti jabdyqtar – qarý-jaraq, tehnıkamen tolyq qamtamasyz etilgen. Osy ýaqytqa deıin soǵys qımyldary júrip jatqan birneshe elde ofıserlerimiz baqylaýshy retinde qatysyp, joǵary deńgeıdegi maman ekendikterin dáleldep qaıtqan.
Dástúrli «Dala qyrany» atty halyqaralyq jattyǵýǵa daıyndyq júrip jatqan «Ile» oqý-jattyǵý ortalyǵynda naqty qımyldarǵa qurylǵan áskerı daıyndyqtar kórsetildi. Bitimgerlik batalon kez kelgen jerge baryp, áskerı bazany ornalastyra alady. Bazaǵa tutqıyldan shabýyl jasalǵan jaǵdaıda atqarylatyn alǵashqy qarsy turý jáne qorǵaný qımyldary, zamanaýı jabdyqtarmen qamtamasyz etilgen áskerı medısınalyq pýnktterdiń jumys barysy, narazylyq sherýlerin beıbit jolmen basý, mınadan tazartý sekildi kúrdeli jattyǵýlardyń qandaı tártippen oryndalatyny depýtattar nazaryna usynyldy. Sonymen qatar, áskerı bazanyń ákimshilik quramy da tanystyrylyp, ár bólimniń atqaratyn mindetine jeke-jeke toqtaldy.
Mundaǵy sarbazdardyń deni birneshe shet tilderin meńgergen. Saptaǵy sarbazdardyń arasynda qyzdar da bar eken. Sóıtsek, zańdyq talapqa sáıkes batalonnyń 10 paıyzy qyzdardan turatyn kórinedi. Sarbazdardyń arasynda soǵys órti tutanǵan memleketterde bolyp, bitimgershilik mıssııasyn atqaryp qaıtqandar da bar.
Oqý-jattyǵý jumystaryna oń baǵa bergen Máýlen Áshimbaev:
– Sońǵy jyldary Qazaqstan álemge bitimgershilik mıssııalarymen tanymal bolyp júrgenin bilesizder. Atap aıtsaq, Iran, Ýkraına, Sırııa memleketterindegi jaǵdaıdyń turaqtalýyna barynsha yqpal etip kele jatyr. Osydan biraz ýaqyt buryn Túrkııa men Reseı arasyndaǵy shıelenisken qarym-qatynasty retteýge de Elbasynyń tikeleı aralasqany belgili. Qazaqstan bitimgershilik mıssııasyn atqarýda tek dıplomatııalyq jolmen ǵana emes, kerek kezinde áskerı qurylymdardy da jiberýge daıyn. «Qazbat» bitimgerlik batalony osy maqsatta qurylǵany belgili. Búgingi maqsatymyz da osy «Qazbattyń» daıyndyǵyn pysyqtaý. Kózimiz kórgendeı, bizdiń bitimgerlik kontıngentimiz BUU aıasynda gýmanıtarlyq aksııalardy júzege asyrýǵa, beıbit halyqtyń qaýipsizdigin qamtamasyz etýge daıyn, – dedi tilshilerge bergen suhbatynda.
Quramynda qos general Baqytjan Ertaev pen Abaı Tasbolatov bar depýtattar áskerılerdiń daıyndyq deńgeıin joǵary baǵalady. Al bir kúnge sozylǵan sapar barysynda aıtylǵan usynystar men talap-tilekter aldaǵy ýaqytta talqylanbaq.
Almas NÚSIP,
«Egemen Qazaqstan»
ALMATY
