Sınoptıkterdiń málimetinshe, kóktemniń ekinshi aıynda elde aýa temperatýrasy qubylmaly bolady. 2026 jyldyń sáýiri kóktemge tán jyly aýa raıymen bastalady. Aıdyń alǵashqy kúnderinde kúndiz aýa temperatýrasy +15…+23°C-qa deıin kóteriledi, al eldiń ońtústiginde +32°C-qa deıin jetip, jazǵa uqsas ystyq bolady. Alaıda birinshi onkúndiktiń sońyna qaraı soltústik-batys óńirlerde sýyq qaıta oralady: túnde aýa temperatýrasy -5°C-qa deıin tómendep, kúndiz +5…+13°C shamasynda bolady. Ortalyqta, ońtústikte jáne ońtústik-shyǵysta ystyq báseńdep, +15…+23°C deńgeıinde saqtalady. Shyǵys óńirlerde aldymen kún jylyp, keıinnen qaıtadan salqyndaıdy.
Boljamǵa sáıkes, sáýirdiń ekinshi jartysynda respýblıkada qaıtadan jyly aýa raıy ornyǵady.
«Soltústikte, ortalyqta jáne shyǵysta aýa temperatýrasy +25°C-qa deıin jylynsa, ońtústik pen batysta +35°C-qa deıin kóteriledi. Degenmen qysqa merzimdi sýyq tolqyndary bolýy múmkin», delingen «Qazgıdromet» habarlamasynda.
Aldaǵy úsh kúnde aýa raıy kúrt ózgeredi
Sınoptıkterdiń aıtýynsha, aıdyń basynda batys jáne soltústik-batys óńirlerde jıi jańbyr jaýady, keı jerlerde nóser jańbyr men naızaǵaı kútiledi. Basqa óńirlerde jaýyn-shashyn aıdyń ortasy men sońyna qaraı baıqalady.
