Densaýlyq saqtaý mınıstrligi túsindirgendeı, Medısınalyq jáne farmasevtıkalyq baqylaý komıteti pasıentterdiń qarjylyq júktemesin azaıtý jáne negizsiz ústeme baǵalardy boldyrmaý úshin dári-dármekterdiń shekti baǵalaryn qalyptastyrý tetigin engizdi.
Baǵalardy qaıta qaraý nátıjesinde ózgerister bólshek saýdada satylatyn shamamen bes myńǵa jýyq dárilik preparat ataýyn qamtydy. Tizimge júrek-qan tamyrlary júıesiniń, tynys alý músheleriniń sozylmaly aýrýlaryn, juqpaly jáne basqa da keń taralǵan aýrýlardy emdeýge arnalǵan dáriler engizildi. Qazirgi ýaqytta 4994 saýda ataýyna shekti baǵalar belgilengen.
Dárihanalar jáne farmasevtıkalyq qyzmettiń basqa da sýbektileri dárilerdi belgilengen shekti deńgeıden aspaıtyn baǵamen satýǵa mindetti.
Sonymen qatar, 1707 reseptisiz satylatyn preparat memlekettik baǵa retteýinen shyǵarylyp, naryqtyq qaǵıdattar boıynsha satylyp jatyr.
Eldiń 20 óńirinde júrgizilgen monıtorıng qorytyndysy boıynsha, 2026 jylǵy naýryzda 2025 jylǵy maýsymmen salystyrǵanda 631 dári ataýy boıynsha baǵa orta eseppen 24,6%-ǵa tómendegeni tirkeldi.
Komıtette baǵa monıtorıngi turaqty negizde júrgiziletini habarlandy. Belgilengen shekti baǵalardan asqan jaǵdaıda ákimshilik jaýapkershilik qarastyrylǵan. Baǵanyń negizsiz joǵarylaý faktileri týraly azamattar DariKZ mobıldi qosymshasy arqyly nemese Medısınalyq jáne farmasevtıkalyq baqylaý komıtetiniń óńirlik departamentterine habarlaı alady.
