– Azamat Baýyrjanuly, Qazaqstan fýtbol federasııasy sheshimimen «Atyraý» fýtbol komandasynan toǵyz upaı alynyp tastaldy. Bul sportshylardyń ǵana emes, jankúıerlerdiń de narazylyǵyn týdyrǵan jaǵdaı boldy. Áńgimemizdi osydan bastasaq. Qandaı sharalar qolǵa alynyp jatyr?
– Bul sheshim, negizi FIFA-dan kelip tústi. 2012 jyldan beri jınaqtalǵan qaryz negizgi sebep bolyp otyr. Munda máseleniń bári respýblıkalyq federasııa sheshiminde kórsetilgendeı emes, bizdiń kinárat-talabymyz bar. Zańgerler halyqaralyq sotta bizdiń quqyǵymyzdy qorǵaıdy. Bul jaǵdaı komandanyń kóńil-kúıine, oıyn nátıjesine keri áserin tıgizdi. Upaılardy keri alý úshin barlyq múmkindikterdi qarastyryp jatyrmyz.
– Jalpy, aımaqtaǵy sporttyq nysandardyń hal-ahýaly qandaı jaǵdaıda?
– Atyraý oblysynda 984 sporttyq nysan bar. Jyl saıyn bul san kóbeıip keledi. Mysaly, ótken jyly Qurmanǵazy aýdanynyń Shortanbaı, Baıda aýyldarynda, Atyraý qalasynyń mańyndaǵy Qyzylbalyq, Aqjar eldi mekenderinde jańa sport keshenderi paıdalanýǵa berildi. Oblys ortalyǵynda tennıs korty ashyldy.
Negizi, óńirde sportymyz órge jyljyp keledi. Atyraý sportynda toqyraý joq dep senimmen aıtýǵa bolady.
– Alaıda, sol tennıs ortalyǵy saltanatty túrde ashylǵanymen, búginge deıin jumysyn bastamaı tur. Buǵan ne sebep?
– Buryn Atyraýda úlken tennıs oınaıtyn oryn bolmady. Táýelsizdiktiń 25 jyldyǵyna oraı jańa sport nysany boı kóterdi. Keshende segiz kort bar, ony 300 kórermen bir sátte tamashalaı alady. Qazir tıisti rásimder júrgizilip, qujattar jasaqtalyp jatyr. Bir aıdan keıin nysan oblystyq basqarma balansyna beriledi, jumys ta sol kezde bastalady.
– Baıdarka jáne kanoe esý sporty elimizde tuńǵysh ret Atyraýda ashylǵan edi. Qazir bul sport túri eleýsizdeý qalyp barady. Respýblıkalyq saıystar ótpeıtin boldy, jaqsy sportshylar ketip qaldy, qural-jabdyqtar jańartylmaǵan...
– Iá, olımpııalyq sport túrin damytý kún tártibindegi mańyzdy másele. Bul baǵytta da biraz jumystardy qolǵa alyp jatyrmyz. Qys mezgilinde jattyǵýlardy úzbeý úshin bizde múmkindik qarastyrylmaǵan, sondyqtan eskekshilerimiz oqý-jattyǵý jıyndaryn Tashkentte ótkizýge májbúr.
– Bıyl Jylyoı aýdanynyń Aqkıiztoǵaı, Shoqpartoǵaı aýyldarynda, Jańa Qaraton aýylynda dene shynyqtyrý-saýyqtyrý keshenderiniń qurylysy aıaqtalady eken. Taǵy qandaı jańa nysandar boı kóteredi?
– Basty jańalyqtyń biri – daryndy sportshylarǵa arnalǵan mektep-ınternat salynady. 300 orynǵa negizdelgen nysan qurylysy bıyl bastalady. 200 oryndyq jataqhana aýyldan kelgen sportshylarǵa arnalady, qalǵan júz orynda oblys ortalyǵynda turatyn balalar jattyǵady. Bazada barlyq sportpen kásibı turǵyda aınalysýǵa múmkindik bolady. Bolashaqta chempıondar ordasyna aınalady degen úmit bar. Atyraý qalasynda kúres túrlerine arnalǵan sporttyq keshenniń de qurylysy bastalady. Qalaǵa qarasty aýyldyq okrýgter aýmaǵynda kross-fıt jáne kúres túrlerimen shuǵyldanýǵa arnalǵan jedel qurastyrmaly sporttyq zaldar qurylysyn júrgizý josparda bar.
– Aldaǵy ýaqytta oblys aýmaǵynda qandaı jarystar ótedi?
– 19 sáýirde taekvondodan tuńǵysh ret jastar arasynda Azııa chempıonaty Jaıyq jaǵasynda uıymdastyrylady. Erkin, grek-rım kúresi, áıelder kúresiniń Qazaqstannyń jastar oıyndary, bokstan Isataı-Mahambet atyndaǵy halyqaralyq jarys, toǵyzqumalaqtan jastar arasyndaǵy el kýbogy, djıý-djıtsýdan respýblıkalyq jastar oıyndary, dzıýdodan el chempıonaty bolady. «Aqbıdaı» aýyl sporty oıyndarynyń oblystyq spartakıadasy da shilde aıynda ótedi degen jospar bar.
Áńgimelesken
Baqytgúl BABASh,
«Egemen Qazaqstan»
ATYRAÝ
