Shahar basshysy qala ákimdiginde QR Aýyl sharýashylyǵy mınıstrligi sý resýrstary komıteti ókilderiniń, Sátpaev atyndaǵy qalalyq kanal basshylyǵy jáne basqa da arnaıy qyzmet ókilderiniń qatysýymen baspasóz maslıhaty ótkenin eske salyp ótti. Jıyn barysynda mamandar Astana sý qoımasynda qalyptasqan jaǵdaıdy kópshilikke túsindirip ótti.
«13-15 sáýir kúnderi tolassyz jaýǵan jańbyrǵa baılanysty Esil ózenine 340 mln tekshe metr kólemde sý qosyldy. «Qazgıdromet» ortalyǵynyń mamandary 100-160 mln tekshe metr kóleminde sý keledi dep boljaǵan edi. Alaıda, kúnniń kúrt jylynýyna baılanysty qardyń erýi de jyldamdap ketti. Osy sebepti tasqyn sý qory kútken kólemnen mol boldy», - dedi sý resýrstary komıtetiniń tóraǵasy Islam Ábish.
Onyń aıtýynsha, qazirgi sátte mamandardyń kúsh salýynyń arqasynda 340 mln tekshe metr sýdyń 90 mln tekshe metri Astana sý qoımasyna buryldy. Qalǵan 250 mln tekshe metr sý kontr retteýshige baǵyttaldy.
«17 sáýirde saǵat 11-den bastap 1 200 tekshe metrge deıin sý keldi. Bul óte joǵary deńgeı. Keıin aǵys qarqyny 1 044 tekshe metrge tústi. Qazir Astana sý qoımasyna kelip jatqan sýdyń kólemi sekýndyna 150-200 tekshe metrdi qurap otyr. Osy oraıda onyń barlyǵyn sý qoımasynda saqtap qalý múmkindigimiz bar. Astana sý qoımasynyń syıymdylyǵy 410 mln tekshe metr bolsa, onda qazir 385 mıllıon tekshe metr sý toltyrylǵan, ıaǵnı taǵy 25 mln tekshe metr jınaı alamyz.
Osy sátte jaǵdaı baqylaýda, Astanaǵa jaqyn mańdaǵy eldi mekenderdi sý basý qaýpi joq», - dep málimdedi Islam Ábish.
Qazirgi tańda Astanada sý tasqynyna qarsy jedel shtab jumys istep jatyr. Olar atqarylatyn jumystardyń keshendi josparyn júzege asyrýda.
