"Keıbir qurylys kompanııalary salynǵan úılerdiń janynan qurylys qoqystaryn da shyǵarmaıdy. Qala tolǵan qoqys. Mundaı buryn tipti Ádilbek Ryskeldiuly kezinde de bolǵan emes" dedi Prezıdent EKSPO kórmesine daıyndyq máselelerin pysyqtaýǵa arnalǵan otyrysta.
Astana ákimi Áset Isekeshev qystan soń, osyndaı qoqystar kóptep anyqtalyp jatatyndyǵyn rastady.
"Qazir zańnamany ózgertý jóninde usynyspen shyǵyp jatyrmyz. Sebebi bul búginde esh zańmen rettelmeıdi" dep jaýap berdi Á. Isekeshev.
"Ol (qurylys kompanııasy - red.) mindetti qoqys jınaýǵa. Turǵyn úı saldy ma, mańaıyna joldar salyp, aǵash otyrǵyzýy kerek. Al olar onymen aınalyspaq túgili, qoqysty da jınamaıdy. Sebebi, biz talap etpeımiz. Aıyppul salyp, sottaý kerek" dedi Prezıdent.
Sonymen qatar, Memleket basshysy jańadan salynyp jatqan úılerdiń syrt kelbetin ózgertýdi tapsyrdy.
«Bizdiń keıbir úılerimizdiń qasbetine qarańyzdar. Prezıdenttiń kóz aldynda turǵan úılerdiń qasbeti, adam júretin joldarda taqtaıshalar túsip qalǵan, buzylyp, jupyny tartqan. Úı ıeleri buny retke keltirmeıdi, sebebi eshkim talap etip jatqan joq. Bizde qys uzaq, qysta qalada jasyl-jelek bolmaıdy, elordany tek ádemi nysandar kórkeıtip turady. Menińshe kók, sary, aq túster bizdiń qalamyzǵa jaqsy jarasady. Osyny bireý qadaǵalap otyrýy tıis. Ońtústikkoreıalyqtar bıik-bıik úıler salyp jatyr. Sup-sur sýyq ǵımarat. Turǵyn úı emes, Ishki ister mınıstrligine arnalǵan mekemeler sııaqty. Tym quryǵanda aq úıler bolýy kerek. Ne qıyndyq bar munda?! Qazir bar ma ol qurylys kompanııasy, ońtústikkoreıalyq ınvestordy turǵyzyńyzdarshy. Biz Sizderdi shaqyrttyq, jaqsy úıler salyp jatyrsyzdar, sol úshin alǵys aıtamyz, biraq nege sol úılerdiń qasbeti basqa turǵyn úılerge qaraǵanda tym nashar?», - dep surady Elbasy HighWhill turǵyn úı keshenin meńzep. «Qurmetti Prezıdent myrza, Siz aıtqan synyńyzdy eskere otyryp, biz barlyq ózgeristerdi engizýge daıynbyz» dedi óz kezeginde ońtústikkoreıalyq ınvestor.
Prezıdenttiń sózinshe, bul jumysty o basta qadaǵalap otyrǵanda, mundaı problemalar týyndamas edi. «Men Aqordadan kúnde barlyǵyn kórip turatynymdy esker. EKSPO qarsańynda jaǵdaıdy túzetesińder dep oılaımyn. Jalpy jaqsy salyp jatyrsyzdar, buny túzetýge bolady» dep atap ótti Elbasy.
