Túsine bilgen adamǵa Qazaqstan halqy Assambleıasynyń róli budan góri tereńde ekenine keshegi bir kúnderi Aqtóbe aımaǵynyń keıbir bólikterin tasqyn men topan sý basqan kezde taǵy da aıqyn kóz jetkize tústik. Rasynda, biz Qazaqstan halqynyń birligi degen sózdi tekten tek qoldanbaıdy ekenbiz. Elimizdi mekendeıtin ózge etnos ókilderiniń memleket quraýshy ult – qazaqtarǵa degen qurmeti men rızashylyǵy sheksiz dep júrgenimiz de naqty shyndyq pen sýarylǵan aqyl sóz hám asyl sóz bolyp shyqty. Shyn máninde, biz bir-birinen irgesi bólinbeıtin, enshisi bir qazaqstandyqtar ekenbiz.
Bulaı dep jerine jetkize sóılep otyrǵan sebebimiz, joǵaryda aıtylǵandaı, tabıǵı apat oryn alǵan kezde jergilikti ult pen toqsannan astam etnos ókilderiniń bári tasqyn sýdyń betin qaıtarýǵa bir jaǵadan bas, bir jeńnen qol shyǵaryp, tas túıin jumyla bilgenderi. Jumyla kótergen júk jeńil degendeı, apattyń tez arada aýyzdyqtalýyna eń aldymen Aqtóbe oblystyq Qazaqstan halqy Assambleıasynyń quramyndaǵy etnomádenı birlestikter, sondaı-aq Qoǵamdyq kelisim keńesteri úlken úles qosty. Olardyń tarapynan oblys jurtshylyǵy men qala turǵyndaryna tastalǵan júrekjardy úndeý jerde qalǵan joq. Bári de bul úndeýdi birden qoldap alyp ketti.
Másele, tek úndeý tastaýmen ǵana shektelgen joq. О́ńirlik Assambleıa músheleri tórt kózderi túgel oqıǵa ornynan tabylyp, olardyń bári sý tasqynynan zardap shekkenderdi qaýipsiz aımaqqa kóshirýge qolushyn berdi. Ári bir kúndik eńbekaqylary men tabystaryn tasqynǵa tap bolǵandardyń arasyndaǵy turmys deńgeıi tómen otbasylar men múgedek jandarǵa aýdarýǵa sheshim qabyldady. Qazirgi kúni olar qaıyrymdylyq sharalaryn odan ári jalǵastyryp jatyr.
Biz mundaı derekti eń aldymen Aqtóbe oblystyq Qazaqstan halqy Assambleıasy tóraǵasynyń orynbasary, hatshylyq meńgerýshisi Bulbul Eleýsinovanyń aýzynan estigende, Assambleıanyń basty maqsatynyń biri qazaq halqynyń tóńiregine toptasý ekendigi sóz júzinde emes, naqty is júzindegi toptasý ekenin taǵy bir tereńirek túısine túskendeı kúı keshtik. Álbette, biz búginde qazaqstandyq patrıotızm men birtektilik jóninde de jıi aıtamyz.
Osy arada patrıotızmniń túp tórkini tereńde ekenin, bul qajet bolǵan qıyn da kúrdeli jaǵdaıda adamdardyń bir-birine qolushyn sozyp, apatty jaǵdaıdan qutqaryp qalý ekenin oqyrmandar nazaryna bergendi jón kórdik. Sonyń naqty mysaly minberde aıtylǵan ádemi sózder men baıandamalardan emes, ómirdiń ózinen tabylǵany da qasterli qundylyq emes pe?! Ári búgingi áńgimemizdi Assambleıa hatshylyǵynan alynǵan ázir derekterden emes, joǵarydaǵydaı máni men mańyzy, tálimi men taǵylymy mol ónegeli is-qımyldan bastap ketýimizdiń basty bir syry da osynda.
Ashyǵyn aıtqanda, Aqtóbe aımaǵyndaǵy Assambleıa qyzmeti san-alýan is-sharalarǵa ǵana emes, sonymen birge, atap aıtýǵa turarlyqtaı birqatar erekshelikterge de toly deýge bolady. Endigi kezekte sonyń bir-ekeýine toqtala ketkendi jón dep sanaımyz. Munyń birinshisi – óńirde Qoǵamdyq kelisim men Medıasııa keńesiniń júıesi júıeli jolǵa qoıylǵany deýge bolady. Medıasııa, bir sózben aıtqanda, túsinistikke kele almaǵan eki taraptyń sot arqyly emes, ózara tatýlasý jolymen bitimgershilikke kelýi degen sóz. Bitistiretinder – medıatorlar.
Medıasııanyń ózgege emes, naqty Assambleıaǵa telinýiniń nendeı syry bar deýi de múmkin bireýler. Oryndy saýal. Mundaǵy basty gáp, joǵaryda aıtylǵandaı, eki jaqtyń medıasııa júıesine júginýi arqyly ózara tatýlyq pen kelisimge kele alýynda. Al bul ekeýi Assambleıa basty negizderiniń biri ekendigi aıtpasa da túsinikti. Medıasııa keńesteriniń Qazaqstan halqy Assambleıasynan qashyq turmaıtynyń basty syry da osynda.
Ekinshi erekshelikti óńirlik Assambleıa quramyndaǵy Bolgar etnomádenı birlestigine qatysty baıyptaýǵa bolady. Ádette, elimizdegi mundaı etnomádenı birlestikterdiń belgili bir turaqty orny, ıakı keńsesi, sondaı-aq jeksenbilik mektepteriniń bolýy qalypty jaǵdaı. Aıtaıyn degenimiz, oblystyq Alǵa aýdanynda bolgarlardyń óz kenti bar ekendigi. Bul kent Bolgarka dep atalady eken. Bolgarlar álemde Qazaqstanǵa jetetin memleket, dál osyndaı jer jánnaty men jumaq joq. Qazaq halqyndaı qushaǵy kim-kimge de aıqara ashyq bir de bir halyq joq. Qazaqstan – óz Otanymyz. Bizdiń maqsatymyz – elimizdiń odan ári ósip-órkendeýine óz úlesimizdi qosý, deıdi.
Uzyn sózdiń qysqasy, keńesip pishken toń kelte bolmas, deıdi dana halqymyz. Aqtóbe aımaǵynda kóp máselelerdiń túıini ózara kelisip ári keńese otyryp sheshilip júrgeni basty tabys, basty rýhanı qundylyq ekeni basy ashyq aqıqat.
Temir QUSAIYN,
«Egemen Qazaqstan»
Aqtóbe oblysy
Sýrette: óńirlik Assambleıa ǵımaraty aldynda
