«Erteń bizdi naǵyz teke-tires kútip tur. Bul match ádettegideı tartysty óterine senimdimin. Eki komanda da jaqsy oınaıdy. Oqý-jattyǵý jıyny kezindegi oıynymyzdy kórsete alamyz dep úmittenemin. Qansha degenmen bastapqy týrlarda basqasha oınaǵan edik. Alań da jańardy, bul kombınasııaly oıynymyzdy kórsetýimizge múmkindik beredi. Jigitter bul matchtyń qanshalyqty mańyzdy ekenin biledi, sondyqtan bárin salýǵa daıyn», dedi Stanımır Stoılov.
Bas bapker sondaı-aq, «Astana Arenanyń» jańa tóselgen gazony jaıly pikir bildirdi.
«Negizi ony qysqy úzilis kezinde de tóseýge bolatyn edi. Al sapasy jattyǵý kezinde belgili bolady. Jańa gazon tóselgennen keıin úırenýge azdap ýaqyt kerek. Daıyndyq kezinde komanda ózin jaıly sezinedi dep úmittenemin», dedi bas bapker.
Qazirgi ýaqytta «Qaırattyń» basty eki qaqpashysy da jaraqat alyp qaldy.
«Jaraqat – fýtboldyń bir bóligi. Bul matchqa Vladımır Plotnıkov daıyn bolady dep oılaımyn. Bizde Erıch jaraqat alyp qaldy. «Qaırat» oıynshylaryna tezirek aıyǵyp, qatarǵa qosylýyn tileımin. Sebebi, eki komandanyń úzdik oıynshylary alańǵa shyǵatyn bolsa, jankúıerler qyzyqty matchtyń kýási bolady», dedi Stoılov.
Týrnırlik kestede «Astana» upaı sany boıynsha kósh bastap keledi. Bul elordalyqtardyń favorıt komanda atanýyna múmkindik bere me?
«Astana» men «Qaırat» arasynda eshqashan favorıt komanda bolmaıdy. Bári maýsym sońynda belgili bolady. Ázirge bul bos áńgime. Qazir moınymyzǵa úlken jaýapkershilik artylyp otyr. Bárin júıeli túrde júzege asyryp, jaqsy qyrynymyzdan kórinýimiz kerek», dedi «Astananyń» bas bapkeri.
Elordalyqtar birneshe match boıy gol jibermeı keledi. Bul qorǵaýshylar arasyndaǵy úılesimdiliktiń nátıjesi me, álde qaqpashy Aleksandr Mokınniń senimdiliginiń arqasy ma? Stanımır Stoılov muny qorǵanysta jıi rotasııa jasap turatynymen ári komandanyń jeńiske degen qulshynysymen baılanystyrdy.
«Qorǵanysta jıi rotasııa jasap turamyz. Sondyqtan qorǵaýshylar arasyndaǵy ońtaıly úılesimdilik dep aıtýǵa kelmes. Birer apta buryn Birinshi lıganyń komandasyna ese jiberdik, muny esten shyǵarýǵa bolmaıdy. Oıynǵa degen nıetiń durys bolmasa, eń osal degen qarsylastan jeńilýiń múmkin. Bastysy – jeńiske degen qulshynys. «Qaıratpen» óter oıynda bárin aqylǵa salyp, ózimizdiń kombınasııaly fýtbolymyzdy kórsetýimiz kerek. Fýtbolda kim ózine joǵary talap qoıa bilse, sol komandanyń jeńiske jetý múmkindigi joǵary bolady», dedi bolgarııalyq maman.
Stanımır Stoılov «Qaırat» kapıtany Baýyrjan Islamhandy elimidegi eń talantty oıynshy dep atap, jyly lebizderin bildirdi.
«Bul fýtbolshy maǵan ylǵı da unaıtyn. Shamasy, Qazaqstandaǵy eń talantty oıynshy bolar. Ol ózin áli de damytýy kerek. Biraq onyń deńgeıine óz baǵasyn tek «Qaırattyń» bapkeri berýi kerek», dedi jattyqtyrýshy.
Stanımır Stoılov Qazaqstan premer-lıgasynyń toǵyz týry ótse de, chempıondyq ataqqa «Astana» men «Qaırat» qana talasady dep aıtý erte ekenin aıtty.
«Eki komanda ózgelerden oq boıy alda keledi dep oılamaımyn. Chempıonatty bizden birneshe upaı ǵana kem aıaqtaıtyn komandalar bar. Birinshilikte kim az qatelik jiberse, sol ujym chempıon atanady», dedi ol.
Bolgarııalyq bapker birinshiliktiń jańa shemasy «Astanaǵa» esh qıyndyq týdyrmaıtynyn aıtty.
«Shyny kerek, bizge bári-bir. Osyǵan deıin «altylyq» bolyp, upaılaryn bólisetin. Bul keıbir komandalarǵa unamaǵany anyq. Biz qandaı tártip ornatsa da jeńemiz. Komandań myqty bolsa, upaı jınap, jeńiske jetesiń. Chempıonatta joly bolmaǵan komandalar bul shema ne úshin unamaǵanyn oılaǵany jón», dep sózin qorytty «Astananyń» bas bapkeri Stanımır Stoılov.
Aıta keteıik, «Astana» men «Qaırat» erteń elordadaǵy «Astana Arena» stadıonynda kezdesedi. Match Astana ýaqytymen 20:00-de bastalady.
