Altyn Orda, Noǵaıly dáýirinen jetken tarıhı dastandy erekshe daıyndyqpen jyrlaǵan balalardyń ónerine zal toly kórermen rıza boldy. Arnaıy bezendirilgen sahna tórinde sol zamannyń úlgisine saı kıim kıip, úkili dombyralarymen óner kórsetken 40 ul men qyz bes jyl buryn ashylǵan «Er Edige» jyr mektebiniń tárbıelenýshileri. О́ńirdegi mádenıet jáne óner salasynyń ardagerleri, ýnıversıtet oqytýshylary men ólketanýshylar, dástúrli ánshiler men termeshiler bes jylda úlken belesti baǵyndyrǵan balalar men olardyń ustazy, Mádenıet salasynyń úzdigi, jyraý Ádilbek Sarınniń ólsheýsiz eńbegin atap ótti.
2021 jyly Aqtóbe oblystyq halyq shyǵarmashylyǵy ortalyǵy janynan ashylǵan «Er Edige» mektebiniń tabaldyryǵyn ımene attaǵan jas jetkinshekter jyr-tolǵaýlar men terme-dastandardy jattap, kóne sózderdiń qupııasyn meńgerip, tynbaı izdendi. Ádilbek Sarın jıi-jıi «Jyraý shaıy», «Jyr saǵaty» sabaqtaryn kópshilik arasynda ótkizip, balalardy sahnaǵa úıretti. Bes jyl oqyp-úırenýge, tájirıbe jınaýǵa az ýaqyt emes. Osy kezeńde ónerli ulandar oblystyq, respýblıkalyq, halyqaralyq deńgeıde ótkizilgen jyr baıqaýlarynda top jardy. О́z bastamalarymen oblystyq mádenıet basqarmasynyń qoldaýymen «Edige degen er eken...», «Qobylandy degen eri bar...», «Tolǵaýda tolǵaý sózder bar» saıystaryn ótkizdi.
Eń bastysy – osy ortadan úzilip qalǵan Aqtóbe óńiriniń jyraýlar mektebi dástúrin jalǵastyrýdy nıet etken jastar shyǵyp jatyr. О́zindik oryndaýshylyq dástúri qalyptasqan aqtóbelik jyraýlar mektebi oryndaýshylarynyń jyr-maqamyn saqtap kelgen quımaqulaq qarttar kelmestiń kemesine ketken soń ıgi dástúr úzilip qalǵandaı edi.
«Biz HIV–HVII ǵasyrlardaǵy Altyn Orda men Noǵaı ordasyndaǵy tarıhı oqıǵalardy sýrettep, 41 batyrdyń erligin nasıhattaıtyn 36 jyrdan turatyn Muryn Seńgirbekulynyń «Qyrymnyń qyryq batyryn» sahnaǵa shyǵardyq. 41 batyrǵa qatysty jyr úzindilerin 40 shákirtim jeke-dara oryndap shyqty. Dastandy oqıǵa jelileri men tarıhı hronologııalyq júıelilikpen úsh topqa bólip jyrladyq. Bul akademık Qanysh Sátbaevtyń basshylyǵymen aqyn Márııam Hakimjanova 1942 jyly Muryn jyraýdan jazyp alǵan 36 dastandaǵy Ańshybaı batyr men onyń urpaqtary, Qaradóń batyr men urpaqtary, Qobylandy, Qaztýǵan, er Qosaı, er Kókshe, er Keńes, Telaǵys syndy batyrlar. Jurt baǵasyn berip jatyr. Biraq áli de kóp izdenis kerek, oryndaýshylyq sheberlikti shyńdaýymyz kerek», deıdi ustaz-jyraý Ádilbek Sarın.
Aqtóbe oblysy
