«Erteńiń úshin aıanba!»

«Nur Otan» partııasynyń «Erteńiń úshin aıanba!» baǵdar­lamasy otbasylyq bıznesti ashý jáne damytý, suranysqa ıe mamandyqty tańdaý, sondaı-aq áleýmettik qyzmetter men tólemderdi, medısınalyq qyzmetterdi alý, turǵyn úıge ıe bolý sııaqty ártúrli ómirlik jaǵdaılardyń durys sheshimin tabýǵa kómektesýge arnalǵan. Keshe Pavlodarda «Nur Otan» partııasynyń «Erteńiń úshin aıanba!» baǵdarlamasynyń iske asyryla bastaýyna arnalǵan forým bolyp ótti. Baǵdarlamanyń tıimdiligin baǵalaý aımaǵy retinde Pavlodar oblysynyń tańdalǵany kezdeısoq emes. Qazirgi tańda oblys Qazaqstannyń iri ındýstrııaldy aımaqtarynyń biri bolyp tabylady. Sonymen qatar úlken tabıǵı-resýrstyq áleýe­ti, óndiristik jáne áleýmettik ınfraqurylymy, joǵary ǵylymı-tehnıkalyq qýaty, Ortalyq Azııa men Sibir ara­syndaǵy baılanystyrýshy róli aımaqtyń memleket eko­nomıkasyndaǵy strategııalyq mańyzyn aıqyndaıdy. Eńbekpen qamtylmaǵan jáne jumyspen ózin-ózi qamtyǵan azamattar barynsha tartylǵan shaǵyn bıznesti odan ári da­mytýǵa múmkindik beretin basty faktorlardyń biri – shaǵyn bıznestiń naqty túrin tańdaý kezinde halyqqa baǵdar beretin tutynýshy naryqtyń egjeı-tegjeıli taldaýy bolyp tabylady. Forým qatysýshylary aldynda sóılegen sózinde «Nur Otan» partııasy Tóraǵasynyń birinshi orynbasary Nurlan Nyǵ­matýlın: «О́zin-ózi jumyspen qamtyǵan halyq – ár memlekettiń eko­nomı­kasynyń negizi jáne úlken kadrlyq rezervi bolyp tabylady. Sondyqtan Elbasymyz, partııamyzdyń Tóraǵasy Nursultan Ábishuly Nazarbaevtyń tapsyrmalarynyń biri – ol elimizdiń árbir azamatyn jumyspen qamtamasyz etý, jańa kásipterdiń damýyna jaǵdaı jasaý, qajet bolǵan jaǵdaıda jańa maman­dyqtarǵa da qaıta oqytý. Sonyń nátıjesinde halyqtyń áleýmettik jaǵdaıy odan ári jaqsaratyn bolady», – dedi. Forým jumysynyń nátıjesinde shaǵyn bıznesti damytý men qoldaý boıynsha memlekettik organdar, azamattyq qoǵam ınstıtýttary men qarjylyq qurylymdarǵa usynystar ázirlendi. «Egemen-aqparat».