Endi, mine, el Táýelsizdiginiń 20 jyldyq merekesi qarsańynda el kókeıindegi sol ıgilikti sharýaǵa núkte qoıylatyn syńaıly. Soǵan oraı respýblıkalyq konkýrs ótkizilip, oǵan 32 joba avtory qatyssa, sonyń ishinen músinshi Edige Rahmadıevtiń jobasy jeńimpaz dep tanyldy. Sol jeńimpaz músinshi Semeıge kelip, mundaǵy eldiń de eskertpelerine qulaq túrip qaıtty. Azattyqtyń aq tańy dep atalatyn alyp eskertkish jańa kópirdiń oń jaǵalaýyndaǵy aıshyqty alańǵa ornatylmaq.
Dáýlet SEISENULY. Semeı.
JYLDYŃ EŃ ÚZDIK DÁRIGERI. Bıyl Qyzyljar óńirinde bala ólimi 19, týberkýlezge shaldyǵý 2,6 paıyzǵa tómendep, ana ólimi tirkelgen joq. Sábılerdiń dúnıege kelý kórsetkishi 4 esege artty. Júrek-qan tamyrlary aýrýlary da azaıyp keledi. Aq halatty abzal jandardyń tól merekesi kúni oblys ákimi Serik Bilálov onkologııalyq dıspanserdiń bas dárigeri E. Ábdirimov pen densaýlyq saqtaý salasyn damytý oblystyq fılıaly dırektorynyń orynbasary T.Baıazıtovaǵa «Densaýlyq saqtaý isine qosqany úshin» medalin tapsyrdy. Bir top dáriger «Qazaqstan Respýblıkasynyń densaýlyq saqtaý isiniń úzdigi» belgisin aldy. Al Densaýlyq saqtaý mınıstrliginiń sheshimimen oblystyq kardıologııalyq ortalyqtyń bólim meńgerýshisi, medısına ǵylymdarynyń kandıdaty Sergeı Chereda «Jyldyń eń úzdik dárigeri» atandy.
О́mir ESQALI. Soltústik Qazaqstan oblysy.
BAS MÚFTI BATASYN BERDI. Juma kúni Qorǵaljyn aýdanyndaǵy Sabyndy aýylynda Jaqsygeldi Hamıtjanov atyndaǵy jańa meshit pen medrese ashyldy. Saltanatty sharaǵa jınalǵan jamıǵatty Qazaqstan musylmandary dinı basqarmasynyń tóraǵasy, Bas múftı, Orta Azııa Múftıler keńesiniń tóraǵasy Sheıh Ábsattar qajy Derbisáli, oblys ákiminiń orynbasary Ashat Qaınarbekov, aýyl aqsaqaly Saılaýbek Kamıev, Bıken apa Hamıtjanova quttyqtady. Hamıtjanovtar otbasynyń qarjysymen jáne jurtshylyqtyń demeýshiligimen salynǵan rýhanı keshenniń aýmaǵy 370 sharshy metrdi alyp jatsa, munarasynyń bıiktigi 20 metrden asady. Munda 170 oryndyq erler, 70 oryndyq namazhana bar. Al 70 oryndyq medresege oqýshylar qabyldaý men dáris júrgizý «Astana-Medrese» ortalyǵyna júktelse, oǵan jumsalatyn shyǵyndy Hamıtjanov áýleti kóteredi.
Baqbergen AMALBEK. Aqmola oblysy.
ÁKIMDER DOP TEPTI. Burnaǵy kúni Shıeli aýdanynda oblys aktıviniń kóshpeli otyrysy ótken. Onyń sońy oblys ákimdigi men Shıeli aýdanynyń ákimdigi arasyndaǵy fýtboldan dostyq kezdesýge jalǵasty. Oblystyń komandasyn alańǵa aımaq basshysy Bolatbek Qýandyqov bastap shyqty. Al quramynda jeti aýdannyń ákimi bar Shıeliniń komandasyna aýdan ákimi Nurlybek Nálibaev kapıtandyq jasady. Jasyl alańdaǵy oıyn tartysty ótti. Esepti aldymen oblystyń komandasy ashty. Shıeli aýdanynyń komandasy da qarap qalǵan joq. Nátıjesinde dostastyq kezdesý 2:1 esebimen oblys komandasynyń paıdasyna sheshildi.
Erjan BAITILES. Qyzylorda oblysy.
JORYQ BRESTI BETKE ALDY. О́tken aptada Uly Otan soǵysy bastalǵanyna jetpis jyl tolýyna oraı motojoryqshylar Oraldaǵy Mánshúk Mámetova atyndaǵy alańnan Brest qalasyna attanyp ketti. Olar 22 maýsym kúni osynda ótetin saltanatty sharaǵa qatyspaq. Halyqaralyq sharany soǵysta habarsyz ketkender týraly málimetter izdestirýmen aınalysatyn «Bereg» qoǵamdyq birlestigi uıymdastyryp otyr. Sankt-Peterbýrgte qonys tepken atalǵan uıymǵa Oral qalasynyń túlegi Igor Pınchýk jetekshilik jasaıdy. «Dástúrge aınalyp kele jatqan halyqaralyq motojoryqshylar saıysynyń basty maqsaty – bozdaqtardyń erligin ulyqtaý. Patrıottyq tárbıeniń jańa órisin ashý», deıdi ol.
Temir QUSAIYN. Oral.
JETINShI AÝLA KLÝBY AShYLDY. О́tken aptanyń beısenbisinde oblys ortalyǵy – Taraz qalasynda búldirshinderge arnalǵan osymen jetinshi aýla klýby ashyldy. Búginde Baızaq batyr kóshesinde turatyn balalar men jaqyn mańdaǵy №16 jáne №24 gımnazııa oqýshylarynyń qýanyshynda shek joq. О́ıtkeni, «Qazaqstan aýyl jastary» resýrstar bazasy ortalyǵy janynan ashylǵan aýla klýbynda bı, sýret úıirmesi, kompıýterlik kýrs, ınternet jáne shahmat, doıby, toǵyzqumalaq seksııalary jumys isteıdi. Oblys ortalyǵyndaǵy barlyq aýla klýbtary demeýshiler bólgen qarjy arqyly jumys atqarýda.
Kósemáli SÁTTIBAIULY. Taraz.
SPORTShYLAR ZAÝYT JÚLDESIN BО́LISTI. О́tken aptada Aqsý qalasynda «Qazhrom» Transulttyq kompanııasy» AQ-qa qarasty ferroqorytpa zaýytynyń sport kesheninde óndiris oryndary arasyndaǵy 8-shi jazǵy sporttyq oıyn túrlerinen jarys bolyp ótti. Oǵan elimizdiń óndiristik kompanııalarymen qatar, Reseıdiń Serovsk ferroqorytpa zaýytynan kelgen barlyǵy 400-deı sportshy qatysty. Halqymyzdyń ulttyq salt-dástúrlerine saı órnektelgen keshen ishindegi sport merekesi shashý shashylyp, «Qarajorǵa» bılep baryp bastaldy. Alaý oty jaǵyldy. «Kazhrom» metallýrgııanyń kóshbasshysy ǵana emes, sport pen áleýmettik salany damytýda da alda keledi. Sóıtip, bul joly da aqsýlyq zaýyt sportshylary júldeli oryndy ıelendi.
Farıda BYQAI. Pavlodar oblysy.
