Assambleıa tóraǵasyn qabyldady

Keshe Parlament Májilisiniń Tóraǵasy Oral Muhamedjanov Eýropa Keńesi Parlamenttik Assambleıasynyń (EKPA) tóraǵasy Mevlıýt Chavýshoǵlyny qabyldady, dep habarlady Májilistiń baspasóz qyzmeti. Májilis Tóraǵasy meımanǵa Islam Konferensııasy Uıymy Syrtqy ister mınıstrleri keńe­si­niń 38-shi sessııasyna qatysýǵa kelgeni úshin jáne EKPA ju­my­synda bizdiń elimizge qoldaý jasaǵany úshin alǵysyn bildirdi. EKPA delegasııasy ús­ti­miz­de­gi jyly 3 sáýirde ótken pre­zı­denttik saılaýǵa baıqaýshy retinde belsendi qatysty. Jáne de saı­laýǵa ádil ári joǵary baǵa berdi. Jalpy, sáýirdegi saılaýǵa 1050 táýelsiz baıqaýshy qatysty. Barlyǵy da saılaýdy ulttyq zańdarymyzǵa jáne halyqaralyq standarttarǵa sáıkes ótkenin málimdedi. «Qazaqstannyń Tuń­ǵysh Prezıdenti – Elbasy Nur­sul­tan Nazarbaevtyń saılaýshy­lar­dyń 95,55 paıyz daýysyn jı­naýy Tuńǵysh Prezıdenttiń ishki jáne syrtqy saıasattaǵy júrgizip otyrǵan baǵytynyń búkil ha­lyq­tyń qoldaýyna ıe ekendigin kór­setedi»,  dedi O.Muhamedjanov. Májilis Tóraǵasy 2011 jyly sáýir aıynyń sońynda Astanada Túrki tildes elder Parlamenttik Assambleıasynyń (Túrk PA) ekinshi otyrysy ótkenin, sol basqosý barysynda Túrk PA-nyń tóraǵa­lyq mindeti Ázerbaıjan Res­pýb­lıkasynan Qazaqstan Respýblı­kasyna tabys etilgenin aıtty. Maýsym aıynda Astana bir­qa­tar halyqaralyq sharalardyń or­ta­lyǵyna aınaldy. Sonyń ishin­de VII Búkilálemdik Islam ekono­mı­kalyq forýmy bolyp ótti. Oǵan eki myńdaı ókil qatysty. Sol basqosýda Qazaqstan Prezıdenti N.Nazarbaev birqatar ómirsheń usynystardy jarııa etti. Atap aıtqanda, Elbasy Islam Konferensııasy Uıymyna múshe elderdiń qatysýymen halyqara­lyq ınnovasııalyq qor qurýdy usyndy. Islam Damý banki ja­ny­nan shaǵyn jáne orta kásip­ker­lik qoryn qurý qajettigin aıtqan bolatyn. Májilis Tóraǵasy bul usynystar aldaǵy ýaqytta IKU-ǵa múshe elder tarapynan qol­daý­ǵa ıe bolatynyna senim bildirdi. Sondaı-aq Astanada Shanhaı yntymaqtastyq uıymynyń me­reı­toılyq otyrysy bolyp ótti. Mevlıýt Chavýshoǵly óz kezeginde Qazaqstan sońǵy jyldary halyqaralyq dárejede zor bedelge ıe bolǵanyn aıtty. «Atap aıt­qanda, ótken jyly EQYU-ǵa tór­aǵalyq mindetin abyroıly at­qar­dy. Endi qazir Islam Konfe­ren­sııasy Uıymyna da sátti jetekshilik etýde. Endi Astanada atal­ǵan uıymnyń jańa ataýy paıda boldy. IKU-nyń jańa baǵyttary paıda bolmaq. Bul Islam Konferen­sııasy Uıymy úshin erekshe tarıhı sát», dedi Mevlıýt Chavýshoǵly. Meıman prezıdenttik saıl­aý­dyń sátti ótkenimen quttyqtady. Qazaqstanǵa izgi tilegin jetkizdi.