Alystaǵy aǵaıyndarǵa rýhanı sálemdeme

Astanada ótken Dúnıejúzi qazaq­tary­nyń besinshi quryl­taıynda Elbasymyz, «Nur Otan» halyqtyq-de­mo­kratııalyq par­tııa­­synyń Tóraǵasy Nursul­tan Nazarbaev el Táýelsizdiginiń 20 jyldyǵy qarsańynda ótip jat­qan mundaı aýqymdy sharaǵa otandastary­myz tek toı toılaý úshin emes, keńinen oı tolǵaý maq­satymen bas qosyp otyr­ǵanyn aıta kelip, tıisti sala qyzmet­ker­lerine syrtta júrgen aǵaıyn­dardy rýhanı qoldaý jóninde tapsyrma bergen bolatyn. Soǵan oraı, «Nur Otan» partııasy Elbasy partııasy retinde bir ıgilikti sharýany bastap ketti. Iаǵnı, sár­sen­biniń sátinde qasıetti Semeı shaha­ryn­da qazaq dıasporalary turyp jatqan shet aımaqtarǵa rýhanı kómek kórsetý maqsatymen ıgilikti bir aksııa ótkizildi. El Táýelsizdiginiń 20 jyldyǵyna oraı ótkizilgen al­ǵashqy shara ústinde nur­otan­dyqtar Taýly Altaı men Moń­ǵo­lııa­daǵy otandastarymyzǵa eli­mizdiń egemendikke qol jetkizgennen bergi jetistikterin baıandaıtyn  myńdaǵan kitap, Ult kóshbasshysynyń eńbek­teri, halqymyzdyń án-kúıleri, qazaq­standyq rejıs­serlerdiń kórkem jáne derekti fılmderi jazylǵan ún­taspa jınaqtary men fotoal­bom­daryn merekelik syı retinde jó­neltti. Atalǵan sharaǵa arnaıy kelip qa­tys­qan «Nur Otan» partııasy Tóraǵa­sy­nyń birinshi orynbasary Nurlan Nyǵ­matýlın Ertis ózeni jaǵasynda ótken mıtıngide «Partııa Tóraǵasy Nursul­tan Nazarbaev aıtqandaı, Qazaqstan  álemdegi barsha qazaqtyń qutty sha­ńy­ra­ǵy, sondyqtan syrtta júrgen aǵaı­yn­dar álemniń qaı túkpirinde júrse de qazaq halqynyń bir bólshegi ekenin esh umytpaýy kerek deı kelip, búgingi aksııa – ol shette júrgen aǵaıyndarǵa óziniń tarıhı atamekeni bar ekendigin, olardy bizdiń umytpaı­tyn­dy­ǵymyz­dyń aıqyn aıǵaǵy dep atap kórsetti. Qazirde nurotandyqtar bastamasymen Baıan-О́lgeıde ámbebap sport alańynyń qurylysy júrip jatqandyǵy da sonyń taǵy bir dáleli. Mıtıngide sóz alǵan oblys ákimi Ber­dibek Saparbaev ta syrttan kóship kel­gen aǵaıyndarǵa jasalyp jatqan qam­qorlyqqa toqtaldy. Aıtalyq, ob­lys ortalyǵy О́skemen men Kýrchatov qa­lasynda oralmandarǵa arnalǵan tur­ǵyn úıler qatarǵa qosylǵany úlken qýa­nysh. Mıtıngide, sondaı-aq Semeı qalasynyń ákimi Aıbek Kárimov, Shá­kárim atyndaǵy Semeı memlekettik ýnıversıtetiniń prorektory, professor Arap Espenbetov, Mońǵolııadan kelip, Semeı pedagogıka ınstıtý­tynda oqyp jatqan Dáýlet Erlan sóz sóıledi. Rýhanı turǵydaǵy júk tıelgen bes kólik osy aradan alystaǵy aǵaıyndar qazirde mekendep jatqan shet aımaqqa attanyp ketti. Kósh kerýendi semeılikter «Atameken» ánin shyrqap turyp zor saltanatpen shyǵaryp saldy. Dáýlet SEISENULY, Semeı.