«Jumyspen qamtý – 2020» baǵdarlamasy júzege asyrylmaq

Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda osynyń aldynda qabyldanǵan «Jumyspen qamtý-2020» baǵdarlamasyn júzege asyrý tetikteri talqylandy. Osy másele boıynsha baıandama jasaǵan Eńbek jáne halyqty áleýmettik qorǵaý mınıstri Gúl­shara Ábiqalyqova ortalyq jáne jergilikti memlekettik organdarmen birlese otyryp, baǵdar­la­ma­ny júzege asyrýǵa qajetti daı­yn­dyq jumystaryn júrgiz­gen­digin málimdedi. Eń aldymen tıisti quqyqtyq baza qalyptastyryldy. Parlamentte «Qazaqstan Respýblıka­sy­nyń keıbir zańnamalyq aktilerine jumyspen qamtý jáne ha­lyq­ty áleýmettik qorǵaý máse­leleri boıynsha ózgerister men tolyqtyrýlar engizý týraly» zań qabyldandy. Osy zańda birqatar jańa kózqarastar qalyptasty­ryl­dy. Máselen, halyqty ju­mys­pen qamtýǵa járdemdesýdiń belsendi sharalaryn iske asyrý, baǵdarlamaǵa qatysýshylardyń jaý­apkershiligi, baǵdarlamaǵa qa­ty­sýshylarmen memleket ara­syn­da áleýmettik kelisim-shart jasasý, aýdandar men qalalar deń­geıinde jumyspen qamtý orta­lyq­taryn qurý sekildi birqatar jańa túsinikter men sharalar belgilendi. «Turǵyn úı qatynastary týraly» Zańǵa jumyspen qamtý baǵdarlamasyna qatysýshylarǵa qyzmettik turǵyn úı berý jó­ninde qosymsha normalar engizildi. «Memlekettik ataýly kómek týraly» Zańǵa Úkimet usynǵan jumyspen qamtýǵa járdemde­sý­diń belsendi sharalaryna qatysý­ǵa baılanysty osy kómek júıe­sin jetildirýge baǵyttalǵan óz­gerister engizildi. Jalpy, baǵdarlama birneshe baǵyttan turatyndyǵyn aıtýy­myz kerek. Sonyń birinshi baǵy­tynda oǵan qatysatyn adamdardy oqytýdy, olardyń jumysqa or­na­lasýyna járdemdesýdi jáne olar­ǵa memlekettik qoldaý sharalaryn kórsetýdi uıymdastyrý men qar­jylandyrý qaǵıdalary engizilgen. Ekinshi baǵyt boıynsha baǵ­darlamaǵa qatysýshylarǵa memlekettik qoldaýdy uıymdastyrý jáne qarjylandyrý, sonyń ishinde mıkrokredıttik uıymdar men kredıttik seriktestikterge osy maqsatta jeńildikti nesıeler berý máseleleri qarastyrylǵan, úsh­inshi baǵytta baǵdarlamaǵa qa­tysýshylardyń arasynda basqa jerlerden baryp jumys isteı alatyn utqyr toptardy uıym­das­tyrý, olarǵa osyǵan baılanysty tıisti qoldaýlar kórsetýdiń jú­ıeleri saralanǵan. Atalǵan baǵdarlamany júzege asyrý úshin Úkimet aıasynda Ve­domstvoaralyq komıssııa qurý tý­raly qaýly qabyldanǵan bola­tyn. Munan keıin baǵdarlamany júzege asyrý úshin Eńbek jáne halyqty áleýmettik qorǵaý mı­nıstriniń birneshe buıryqtary jarııalandy. Qazirgi bar bos ju­mys oryndary men boljamdy ju­mys oryndarynyń jalpyult­tyq derek qory qurylyp, tıisti derekterdi jınaýǵa arnalǵan tetikter men nysandar bekitildi. Jergilikti atqarýshy organdar aıasynda óńirlik aýdandyq komıssııalar qurylyp, olardyń jumys isteý tártibin qarastyratyn ereje bekitildi. Halyqty jumyspen qamtý ortalyqtary da quryldy. Baǵdarlamaǵa áleýetti qatysýshy­lardyń sany anyqtaldy. Munyń syrtynda basqa da kóptegen jumystar júzege asyryldy. Mınıstrdiń aıtýy boıynsha, 2015 jylǵa qaraı elimizde 1,5 mıl­­lıonǵa jýyq adam osy baǵ­dar­lamaǵa tartylyp, elimizdegi kedeılik deńgeıi 6 paıyzǵa deıin azaıa­tyn, al jumyssyzdyq deńgeıi 5,5 paıyzǵa deıin tómendeıtin bo­lady. Baǵdarlamany qanat­qaqty rejimde iske asyrýǵa bıylǵy jy­ly res­pýblıkalyq bıýdjetten bar­lyǵy 40 mıllıard teńge bó­lin­di. Osy qarjyǵa 100 myńnan as­tam adam jumyspen qamtýǵa baı­la­nysty memlekettik qoldaý shara­la­ryn alatyn bolady dep belgilengen. Máseleni qorytyndylaǵan Úki­met basshysy Kárim Másimov baǵ­dar­lamany júzege asyrýǵa qa­tysty tıisti oryndarǵa tap­syr­malar berdi. Suńǵat ÁLIPBAI.