«Boksshylarymyzdyń deńgeıi Azııa dodasymen ólshenbeıdi»

– Serik Kerimbekuly, myqtynyń myqtysyn aıqyndaǵan taǵy bir Azııa chempıonaty tarıh qoınaýyna attandy. Qorytyndy pikirińizdi aıtsańyz.
– Birinshiden, osyndaı týrnırdi joǵary deńgeıde uıymdastyra alǵan О́zbekstan memleketiniń boks federasııasyna Azııa boks konfederasııasy jáne óz atymnan alǵys aıtqym keledi. Qonaqtardy kútip alý, boksshylardy avtokólikpen tasymaldaý, iship-jemi, boks zaly barlyǵy talapqa saı jasaqtalǵan. Muny tek men emes, ózge elden kelgen boks mamandary da aıtyp otyr. О́zge qurlyqtaǵy áriptesterimiz de jarystardy biz sekildi osyndaı joǵary deńgeıde ótkizýge kúsh salsa, onda bul sport túri tartymdy ári jas boksshylar úshin úlken belesterdi baǵyndyrýdyń birden-bir múmkindigi bolar edi. 
– Azııa qurlyǵy birinshi bolyp álem chempıonatyna irikteý týrnırin ótkizdi. Munyń ózindik sebebi joq pa?
– Durys baıqaǵansyz, shynynda da biz alǵash bolyp irikteý jarysyn ótkizip aldyq. Der kezinde uıymdastyryp jibergenimizdiń sebebi de joq emes. Tamyz aıynda ótetin jahandyq ja­rys­qa nebary úsh-aq aı qaldy. Qazirgi boks biz­diń kezdegi saıystarmen salystyrýǵa da kelmeıtinin bilesiz ǵoı. Buryn biz áde­mi óner kórsetýge daǵdylanatyn edik. Jankúıerler rahattanyp otyryp ta­ma­shalaıtyn. Al qazir boksshylar ashyq urysqa kóshken. Sol sebepti de ja­ra­qattar kóp bolady. Jaraqatynan aıyǵý úshin biraz ýaqyt ketetini sózsiz. Osyndaı jaıttardy eskerip, erte ótkizý kerek dep sheshtik. 
– Bıylǵy dodaǵa qatysýshy mem­le­kettiń de, boksshynyń da sany kóp bol­ǵan sııaqty...
– Ol úshin biz tek qýanyshtymyz. Qatysýshy elderdiń kóp bolǵany bir bólek, sportshylardyń deńgeıi de joǵary bolǵany qýantady. Ásirese, Shrı-Lanka sportshylary jaqsy qyrynan kórine bildi. Sondaı-aq soǵys dúrbeleńi bolyp jatqanyna qaramastan, Sırııa quramasynyń boks-
shylary tórt joldamany jeńip alǵany fantastıka dep baǵalaýǵa laıyq. Bul memlekettiń sportshylaryna aldaǵy ýaqytta da tek sáttilik tileımin.
– О́zbek jankúıerleriniń qoldaýy ózge el boksshylarynyń mysyn basyp tastaǵan joq pa?
– Bilesiz be, bul jerdegi atmosfera maǵan KSRO chempıonatyn eske salady. Ishki birinshilik qaı jerde ótken bolsa, sol qalanyń jankúıerleri óz boksshylaryna myqtap qoldaý kórsetetin. Jankúıer degen boksshyǵa qosymsha ımpýls beredi emes pe?! Osyndaı qol­daýdyń arqasynda ózbek boksshyla­ry esh aıanyp qalmady jáne ózge mem­le­kettiń myqty degen nebir sportshy­lary óz deńgeıinde judyryqtasa almaýynyń bas­ty sebebi de osy. Bul olarǵa sabaq bolary sózsiz. 
– Kórshilerimizdiń az ǵana merzimde bul dodaǵa tyńǵylyqty daıyndalyp úlgergenin nemen túsindirer edi­ńiz? Jalpy, ózbek boksynyń qa­rysh­tap damyp ketkeniniń syry nede dep oı­laısyz?
– О́zbek aǵaıyndarymyz sportty, onyń ishinde boksty únemi joǵary baǵalaıtyn halyq qoı. Bul dodaǵa olar tyńǵylyqty daıyndalyp, naǵyz babynda kelipti. Nátıjesin ózderińiz kórgendeı, olar bul týrnırde atoı saldy. Sońǵy Olımpıada nemese búgingi Azııa chempıonatynyń nátıjesimen salystyryp, ózbek boksynyń bıik shyńǵa jetkenin ańǵarý qıyn emes. Olar búginde Rıo-2016 Olımpıadasynda sátti óner kórsetken quramyn tolyqtaı saqtaı bilgeniniń arqasynda jeńiske jetip otyr.
– Al bizdiń boksshylardyń ónerine qandaı baǵa berer edińiz? 
– Birden ashyǵyn aıtaıyn, biz bu­ryn­ǵy deńgeıden tómendegen joq­pyz. Jalpy, boksshylarymyzdyń deńgeıi Azııa dodasymen ólshenbeıdi. 2012 jáne 2016 jylǵy Olımpıadalarǵa Qazaqstan boksshylary óte jaqsy qu­ra­mmen daıyndalyp, buıyrǵan júl­de­­lerin alyp qaıtqany kópshilikke málim. Alaıda, osy Azııa chempıonatyna sońǵy Rıo Olımpıadasynda óner kórsetken boksshylarymyzdyń tek úsheýi ǵana qatysyp otyrǵany kóp su­raqqa jaýap beredi. Eń bastysy, osy jas býyn 2020 jylǵy Olımpıadaǵa deıin «sen tur, men ataıyn» bolýy shart. Taǵy qaıtalap aıtamyn, eń bas­tysy – Olımpıadada atoı salý. Al bú­ginde kózge túskenderdiń kópshiligi óz deń­geıin Tokıo Olımpıadasyna deıin joǵary ustap turýy neǵaıbyl dúnıe.
– Shynyn aıtý kerek, bul chempıo­nat ózbekterge esemiz ketken jarys ese­­binde este qaldy-aý deımin...
– Shynynda da on boksshymyzdyń se­gizi ózbektermen joly túıisti. Sonyń ishinen tek bireýiniń ǵana mártebesi bıik, ıaǵnı Vasılıı Levıt jeńiske jet­ti. Al qalǵandary teń dárejede nemese sál ǵana basym daýyspen jeńilis tapty. Men bizdiń sportshylardyń jekpe-jegin nemese tóreshilerdiń qı­syq-qyńyr kótergen baǵasyn tal­qy­laýdan aýlaqpyn. Negizi kez kelgen týr­nırde rıng ıesimen qolǵap túıistirý – qıynnyń qıyny. Sebebi, jergilikti jan­kúıerlerdiń toqtaýsyz qoldaýy jáne keı tóreshilerdiń jergilikti boks­shyǵa sál ǵana adamı búıregi burý faktory sheshýshi ról atqaryp jatady. 
– Bir qyzyǵy, ózbek aǵaıyndar sary qurlyq chempıonatyn osymen úshinshi márte uıymdastyryp otyr. Al Qazaqstan birde-bir ret ótkizip kór­mepti...
– Munyń astarynan saıasat izdeýdiń qajeti shamaly. Biz odan da joǵary chempıonatty, ıaǵnı, erler men qyzdar arasynda eki birdeı álem chempıonatyn, eki ret Olımpıadaǵa irikteý týrnırin joǵary deńgeıde ótkizgen elmiz.
– Azııa chempıonaty bizdiń memleket sportynyń órkendeýine qandaı paıdasyn tıgizdi dep oılaısyz?
– Esińizde bolsa, Rıo Olımpıa­da­syn­da tórelik etkenderdiń barlyǵy ju­mys­tarynan ýaqytsha shettetilgen. Osy jarysta qyzmet etken tóreshilerdiń 70 paıyzy kelesi Olımpıadada qyzmet etetinine senimdimin. Bul jerge bizdiń eldiń federasııa ókilderi de qatysty. Olar da bul jerden úlken qorjynmen qaı­tatyny sózsiz. Tóreshilerimizge de kóp nárse úırenetin jer – osyndaı iri doda.
– Sońǵy suraq, aldaǵy jospar­la­ry­ńyzben bólisseńiz...
– Konfederasııa jumysy qazir qyza tústi. Bıyl Vetnamda qyzdar ara­syn­da álem chempıonatyn ótkizemiz. Son­daı-aq, aǵymdaǵy jyly elimizde 19-22 jas aralyǵyndaǵy boksshylar Konfederasııa kýbogyn sarapqa sala­dy. Nege tek 19-22 jas aralyǵy deıtin bol­sańyz, sebebi osy jastaǵy boks­shy­lar eresekter sapyna ótkende óz she­berlikterin tolyqtaı kórsete almaı, týrnırdiń alǵashqy kúnderinde-aq jarystan shyǵyp qalyp jatady. So­ny eskerdik. Osy jas aralyǵyndaǵy boks­shylar shyńdala tússe, bolashaqta qu­ramaǵa qosymsha serpin beretinine se­nimdimin.
– Qazaq boksy jankúıerleriniń atynan suhbatyńyzǵa rahmet!

Áńgimelesken 
Almas MANAP,
«Egemen Qazaqstan»  

Sýretti túsirgen 
Danııar Maılybaev