Elbasy kórnekti óner qaıratkeri Asanáli Áshimovti 80 jasqa tolǵan mereıtoıymen quttyqtap, zor densaýlyq, shyǵarmashylyq tabys tiledi.
Memleket basshysy bıylǵy 12 mamyrda Almaty qalasyndaǵy M.Áýezov atyndaǵy teatrda mereıtoı ıesiniń qurmetine oraı uıymdastyrylǵan merekelik is-sharanyń joǵary deńgeıde ótkenin atap ótti.
– Áriptesterińiz jáne zııaly qaýym ókilderi Sizdiń qyzmetińizge joǵary baǵa berdi. Biz 40 jyldan astam ýaqyttan beri tanyspyz. Sodan beri, ásirese el táýelsizdigi qalyptasqan kúrdeli jyldarda árdaıym qoldaýyńyzdy sezinip kelemin, – dedi Nursultan Nazarbaev.
Sondaı-aq, Memleket basshysy A.Áshimovtiń shyǵarmashylyq qyzmeti Keńester Odaǵy dáýirinde de laıyqty baǵalanǵanyn atap ótti.
– Siz KSRO-nyń, Qazaqstannyń halyq ártisi retinde eń joǵary memlekettik nagradalarmen marapattaldyńyz. Kıno álemindegi Asanáli Áshimovtiń esimin kúlli Qazaqstan maqtan tutady. Siz Qazaqstandaǵy san-salaly shyǵarmashylyq ónerdiń sańlaǵy atandyńyz. Sondyqtan elge kerek qadirli tulǵa bolyp otyrsyz, – dedi Qazaqstan Prezıdenti.
Nursultan Nazarbaev A.Áshimovtiń teatr men kınodaǵy qazirgi tabysty qyzmetin atap ótip, jeke óziniń jáne memleket atynan alǵys bildirdi.
– Mádenıet pen ónerdi damytýǵa qosqan úlesińizdi, elimizdiń áleýmettik-gýmanıtarlyq damýy jolyndaǵy orasan zor jetistikterińizdi, belsendi qoǵamdyq qyzmetińizdi, sondaı-aq halqymyzdyń tilegin eskerip, men Sizge Qazaqstannyń Eńbek Eri ataǵyn berý jóninde sheshim qabyldadym. Soǵan oraı «Altyn juldyz» erekshelik belgisin tabys etemin, – dedi Qazaqstan Prezıdenti.
Sonymen qatar, Elbasy memlekettiń mádenıet salasyn belsendi túrde qoldap kele jatqanyna jáne óziniń «Bolashaqqa baǵdar: rýhanı jańǵyrý» atty maqalasynyń keıbir tustaryna nazar aýdardy.
– Osy jyldar ishinde men Qazaqstan mádenıetin nazarymnan tys qaldyrǵan emespin. «Mádenı mura» baǵdarlamasy aıasynda Qazaqstanda mádenıetti qoldaý baǵytyndaǵy jan-jaqty jumys udaıy júrgizilip keledi. «Astana opera», «Qazaqstan» ortalyq konsert zaly» sııaqty nysandar salynyp, jańa shyǵarmashylyq ujymdar quryldy, elimizdiń barlyq oblystarynda teatrlar jumysy jolǵa qoıyldy. Memleket tek ekonomıkamen ǵana aınalysyp, ónerge qoldaý kórsetpese, bar kúsh-jigerimiz zaıa ketkenmen birdeı. Biz Qazaqstannyń ónerin álemge tanytý jáne nasıhattaý úshin barlyq jaǵdaıdy jasap otyrmyz. Kórnekti qaıratkerlerimizdi búkil jurtqa tanystyryp kelemiz, – dedi Qazaqstan Prezıdenti.
A.Áshimov Memleket basshysynyń el úshin atqaryp júrgen qyzmetin qoldaıtynyn jáne ony maqtan tutatynyn atap ótti.
– Biz gastrolmen jáne kıno túsirý maqsatymen túrli elderge baramyz. Barlyǵy bizdiń eldiń ózińizdeı Prezıdenti bar ekenine tánti bolyp, esimińizdi qurmetpen atap jatady. Búgin ıelengen ataqty avans dep esepteımin. Bizdiń jumysymyz ózgege úlgi bolýǵa tıis. Biz Sizdiń «Tek alǵa!» degen ustanymyńyzǵa súıenemiz. Siz júrgizip otyrǵan saıasatty tolyq maquldaımyz jáne qoldaýyńyz úshin alǵys aıtamyz, – dedi A.Áshimov.
Nursultan Nazarbaev bizdi jetistikterge jetelegen osynaý júırik ýaqyt ishindegi eń basty tabysymyz – Táýelsizdikke qol jetkizgenimiz ekenin atap ótti.
– Jalpy, men zamandastaryma rızamyn. Olardyń arasynda kóptegen zııaly qaýym ókilderi, ǵalymdar men jazýshylar bar. Biz kóp qıyndyqtardy bastan ótkerdik. Aldymyzda halyqty basqasha ómir súrýge úıretý mindeti turdy. Kópshiligi bizdi, elimizdi qoldady. Solardyń arasynda Siz aldyńǵy qatarda tursyz, – dedi Memleket basshysy.
