Sharaǵa ıslam, hrıstıan, ıýdaızm, býddızm, daosızm, sıntoızm, ındýızmniń joǵary mártebeli ókilderi, sondaı-aq birqatar halyqaralyq uıymdardyń basshylary, onyń ishinde BUU О́rkenıetter Alıansynyń dırektory Metıý Hods, Dúnıejúzilik beıbitshilik habarshysy Keńesi Bas hatshysynyń Pıchaı Tovıvıch, Birikken Arab Ámirlikteri toleranttylyq máseleleri jónindegi mınıstriniń keńesshisi Rashıd ál-Týnaıdjı qatysty.
Qazaqstan Respýblıkasy Parlamenti Senatynyń Tóraǵasy, Sezd Hatshylyǵynyń basshysy Qasym-Jomart Toqaev otyrysty asha kelip, dinaralyq ózara túsinistikti nyǵaıtý isindegi Prezıdent Nursultan Nazarbaevtyń bastamalaryna qoldaý bildirgeni úshin sharaǵa qatysýshylarǵa rızashylyǵyn bildirdi.
«Álemdik jáne dástúrli dinder lıderleriniń sezin shaqyrý týraly qazaqstandyq bastama sheńberinde nyǵaıyp kele jatqan únqatysý forýmnyń aınalasyna múddeli qatysýshylardy kóptep tartýda. Memleket basshylary, halyqaralyq uıymdardyń jetekshileri, tanymal saıası jáne qoǵam qaıratkerleri, ǵylymı qoǵamdastyq pen azamattyq sektor ókilderi dinı kóshbasshylardyń únqatysýdaǵy tikeleı seriktesterine aınaldy», dedi Qasym-Jomart Toqaev.
Sondaı-aq, dinı jáne saıası qaıratkerlerdiń dıalogyn nyǵaıtý jónindegi kúsh-jiger erekshe atap ótildi. Q.Toqaev ótken jylǵy mamyrda Astanada túrli elderdiń parlamentshileri, Sezd Hatshylyǵynyń músheleri jáne sarapshylardyń qatysýymen «Dinder terrorızmge qarsy» konferensııasy ótkenin eske saldy.
Senat Tóraǵasy bıylǵy naýryzda Sankt-Peterbýrgte ótken Halyqaralyq terrorızm jónindegi Parlamenttiń konferensııada EQYU jáne TMD Parlamenttik assambleıalarynyń kóptegen depýtattary kezekti VI Sezge qatysýǵa yqylas bildirgenin habarlady.
Q.Toqaev álemniń kóptegen aımaqtaryndaǵy teketirester men ıadrolyq qarýdyń taralý qaýpine baılanysty jahandyq saıası dúrbeleńder kórinisteri kúsheıip kele jatqanyna nazar aýdardy. «Kóptegen elderde álemdik tártipti quldyratý, ksenofobııany órshitý, etnostyq-dinı belgiler boıynsha kemsitý qaýpine ushyratatyn popýlızmge umtylý úrdisi shegine jetip tur. Jer betindegi órkenıettiń barlyq jetistikterin joq qyla alatyn jahandyq ekonomıkalyq, áleýmettik jáne ekologııalyq problemalar da planetamyzdyń qaýipsiz bolashaǵyna qater tóndirýde», dedi Qasym-Jomart Toqaev.
Q.Toqaev óz sózinde ýaqyt aldymyzǵa qoıyp otyrǵan kóptegen syn-qaterlerge ótken jylǵy Dúnıejúzilik ıadrolyq qaýipsizdik jónindegi sammıtte Prezıdent N. Nazarbaev jarııalaǵan «Álem. HHI ǵasyr» manıfesinen jaýap tabýǵa bolatynyn aıtty. Tóraǵanyń pikirinshe, VI Sezge qatysýshy dinı jáne saıası ókilderdiń ony talqylaýy – bizdi qaýipsiz jáne ádiletti álemdi qurýdaǵy izdegen maqsatymyzǵa jaqyndata túsedi.
Q.Toqaev sóz sońynda: «Qazirgi álemde din lıderleriniń róli asa mańyzdy. Halyqaralyq ótkir máselelerdi sheshýde sizderge kóp nárse baılanysty. Biz ortaq kúsh-jigerimizben dinder men órkenıetterdiń shynaıy teketiresterine jol bermeýimiz kerek. Sizderge, din kóshbasshylaryna búkil álem zor úmitpen qarap otyr», dep atap ótti.
Hatshylyq otyrysyna qatysýshylar Álemdik jáne dástúrli dinder lıderleriniń VI Sezin 2018 jylǵy 10-11 qazanda ótkizý týraly sheshim qabyldady. Bul forýmǵa ázirlik barysy týraly jan-jaqty pikir almasý óristedi.
Syrtqy ister mınıstriniń orynbasary Erjan Ashyqbaev sharaǵa qatysýshylarǵa BUU Qaýipsizdik Keńesindegi Qazaqstannyń basymdyqtaryn tanystyrdy.
Otyrys aıasynda álemdik dinder ókilderi «Shapaǵat» medalimen jáne Qazaqstan Respýblıkasynyń Táýelsizdiginiń 25 jyldyǵy qurmetine arnalǵan medalmen marapattaldy.
