Qarjy jáne bıýdjet komıtetiniń tóraǵasy Rashıt Ahmetov salyq saıasatyn jetildirý qazirgi kezdegi ózekti máselelerdiń biri ekenine nazar aýdardy jáne ol kóleńkeli ekonomıka deńgeıin tómendetýge, bıýdjet túsimderin ulǵaıtýǵa, bıznesti ınvestısııalaýǵa yntalandyrý men ákimshilik kedergilerdi qysqartýǵa baǵyttalǵanyn aıtty.
«Qazaqstan Prezıdenti N.Á. Nazarbaevtyń «Bes ınstıtýttyq reformany iske asyrý jónindegi 100 naqty qadam» Ult josparynda janama salyqtardy óndirý tetikterin jetildirý, mindetti túrde kiris pen shyǵystyń salyqtyq esebin júrgizý jónindegi qoldanystaǵy salyq tártibin ońtaılandyrý mindetteri qoıyldy. Memleket basshysy «Qazaqstannyń úshinshi jańǵyrýy: jahandyq básekege qabilettilik» Joldaýynda salyq-bıýdjet saıasatyn jańa ekonomıkalyq ahýalǵa beıimdeý qajettigin atap ótken bolatyn. Salyq saıasatyn bıznestiń «kóleńkeden» shyǵýyna yntalandyrýǵa jáne shıkizattyq emes sektordaǵy salyq bazasyn keńeıtýge baǵyttaý kerek», - dedi senator.
Ol sondaı-aq qoldanystaǵy salyq jeńildikterin ońtaılandyrý, jalpyǵa birdeı deklarasııalaý qarsańynda arnaýly salyq tártipterin qaıta qaraý qajettigin aıtty. Salyq ákimshilendirý tetikteri de jaqsartýdy talap etedi. Soǵan baılanysty Úkimette «Salyq jáne bıýdjetke tólenetin mindetti tólemder týraly» (Salyq kodeksi) jańa kodeks ázirlenip jatyr.
Shara barysynda salyq saıasaty men shaǵyn jáne orta bıznes sýbektilerine salyq aýyrtpalyqtary, sondaı-aq salyq ákimshilendirýlerin odan ári jetildirý máseleleri talqylandy.
Qarjy jáne bıýdjet komıteti otyrysqa qatysýshylarmen birlese otyryp dóńgelek ústel qorytyndysy boıynsha Úkimetke jiberiletin usynystardy ázirledi.
