Aıtuly ult poezııasyna kóldeneńnen qosylǵan júırik emes. Áýelden er-turmany bútin, kóneniń kórkem qazynasyn tal boıyna sińirgen, jańanyń jasampaz úlgisinen ónege alǵan daryn. Kezinde aqynnyń óleńderin alǵash oqyǵan Muqaǵalı Maqataev: «Nesipbektiń óleńderinen jasandylyq baıqalmaıdy, jastyqqa tán ot bar. Aǵynan jarylyp, taýsyla talaptaný, izdenis bar» dese, qazaq poezııasynyń iri ókili Farıza Ońǵarsynova: «...Úsh uıyqtasań da túsińe kirmeıtin nebir asyl teńeýler, oqys oılar, at basyndaı altynǵa bergisiz oqshaý obrazdar, eń bastysy, osynyń bári ulttyq poezııanyń jórgeginde bólenip, besiginde terbelýi Nesipbekti qalamdastarynan daralaı túsedi», –
degen eken.
Bul jolǵy tusaýy kesilgen týyndynyń ereksheligi – aqynnyń shyǵarmashylyǵy jaıly pikir jazǵan, jyrlaryna ádebı turǵydan baǵa bergen avtorlardyń eńbegi túgeldeı toptastyrylýynda. Ǵulama ǵalymdar Rahmanqul Berdibaev, Serik Qırabaevty aıtpaǵanda, aqynyń aldyńǵy tolqyn aǵalary Tumanbaı Moldaǵalıev, Myrzataı Joldasbekov jáne ózimen birge júrgen qatarlas qalamgerler – Járken Bódeshuly, Júrsin Erman, Tursyn Jurtbaı, Serik Turǵynbektiń keńge kósilgen kemel oılary ret-retimen berilgen.
Týyndynyń taǵy bir artyqshylyǵy – kitapta jazylǵan soqtaly qalamgerlerdiń súbeli oılary keıingi ádebıet zertteýshileri úshin taptyrmaıtyn qural desek, týyndynyń «Bostandyq jyrynyń bozjorǵasy» dep atalýy aqynnyń bolmys-bitimin boıyna sińirgen shyǵarmashylyq taǵdyry tárizdes.
Tusaýkeser rásimi kezinde aǵynan jaryla oı-pikir aıtý úshin sahnaǵa kóterilgen qalamgerler túgeldeı týyndyǵa joǵary baǵa berdi. Solardyń biri «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli kitaptyń ǵylymı qundylyǵyna tereńnen toqtala otyryp: «aqynnyń poemalary tutas dáýirdiń epıkalyq ensıklopedııasyndaı, ásirese qazaqtyń qara óleńi men shyǵys shaıyrlarynyń nárli shýmaqtary qatar órilip, tutasyp turǵandaı úndesedi», dedi.
Beken QAIRATULY,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»
