Mánerlep syrǵanaýdan ashyq el chempıonaty ótti

«Almaty Arena» muz aıdynynda Qazaqstan, Qyrǵyzstan jáne О́zbekstannyń 18 jasqa deıingi sportshylary óner kórsetken mánerlep syrǵanaýdan ashyq el chempıonaty aıaqtaldy, dep habarlady Almaty qalasynyń dene shynyqtyrý jáne sport basqarmasynyń baspasóz qyzmeti. Jarysqa 80-ge jýyq mánerlep syrǵanaýshylar qatysqan. Olar elimizdiń barlyq aımaqtarynan jáne shetelderden kelip, mánerlep syrǵanaýdyń úsh baǵyty boıynsha óner kórsetti.  Sport sheberleriniń arasynan bastapqy eki baǵdarlamanyń qorytyndylary boıynsha qyzdar arasynda birinshi oryndy aıtarlyqtaı alshaqtyqpen Elızabet Tursynbaeva (216,46) jeńip aldy. Odan keıingi oryndarda kele jatqan almatylyq Aıza Imanbek pen Aleksandra Saıýtına 135,11 jáne 123,41 upaıdan jınap, ekinshi jáne úshinshi oryndardan kórindi. Er balalar arasynda úzdikterdiń qataryn 150,48 upaımen almatylyq Artýr Panıhın bastady. Onyń izin ala (132,13) upaımen qaraǵandylyq Melıs Hakımov kelse, astanalyq Nıkıta Manko (129,92) upaımen úshinshi oryndy qanaǵat tutty.