Tikeleı efırden tamashalady

Keshe oblys ákimdiginiń májilis zalynda Azattyqtyń 25 jyldyǵyna oraı Astanadaǵy Táýelsizdik saraıynda ótken respýblıkalyq saltanatty jıynnyń tikeleı kórsetilimi boldy. Oǵan máslıhat depýtattary óńir jurtshylyǵy men aktıviniń Qazaqstan halqy Assambleıasy, ardagerler uıym­dary, shyǵarmashyl zııaly qaýym, bilim jáne den­saýlyq saqtaý salalary, jastar uıym­darynyń ókilderi, memlekettik jáne mereıtoılyq marapat ıeleri qatysty. Elbasy Qazaqstannyń shırek ǵasyr­daǵy tabysyn elekten ótkizdi. Osy ara­lyqta ekonomıka artyp, áleýmettik jaǵdaı birshama túzeldi. Qazaq tiliniń órisi keńeıdi. Medısına salasynda aıtarlyqtaı alǵa jyljý baıqalady. Bir ǵana mysal, Qazaqstan jasandy júrek ornatý jaǵynan álem boıynsha Germanııa men AQSh-tan keıingi úshinshi orynda tur. Memleket basshysy Úkimetke aldaǵy jyldan bastap dúnıege kelgen sábıge beriletin járdemaqy men zeınetaqy mólsherin 20 paıyzǵa ósirýdi tapsyrdy. «1991-2016 jyldar aralyǵynda qazaqstandyqtardyń tabysy 40 esege, al eldiń ishki jalpy ónimi 20 esege artty. Shamamen 2 mıllıon jumys orny ashyldy», dedi Nursultan Nazarbaev. Elbasy eldiń damýy jolynda jumys istegen barsha qazaqstandyqqa alǵys aıtty. Eń kúrdeli kezdiń ózinde otandastardyń qoldaýy kúsh-jiger bergenin jetkizdi. Táýelsizdik jyldarynda myńdaǵan mektepter men balabaqshalar salynyp, aǵartý isine jańa tehnologııalyq ádister engizildi. Azattyq alǵan aıshyqty merekege arnalǵan jıynda Memleket basshysy óskeleń urpaqtyń jadyna sapaly bilim, sanaly tárbıe sińirý úrdisi jalǵasa beretinin aıtty. Ásirese, árbir jas qazaqstandyq kásiptik baǵdarda oqytylyp, qoǵamǵa daıyn maman bolyp qosylatyny aımaq ustazdaryn qýantty. «Mekteptegi balalardyń tek qana bilim alyp qana qoımaı, bir kásipti ıgerýine múmkinshilik jasalatyny, bizdiń ulttyq bilim-ǵylymnyń, rýhanııat mamandarynyń órkenıetti túrde bilim alatynyna jáne osy salanyń damýyna arnalǵan Elbasynyń sózderi erekshe tebirentti. Jańa tehnologııalardy, jańa mamandyqtardy ıgerýde, bilim-ǵylym salasyn jetildirý, otandyq óndiristerdi órkendetýge osynyń barlyǵyna negiz qalanyp tur», deıdi tikeleı efırdi tamashalaǵan M.Mámetova atyndaǵy Qyzylorda gýmanıtarlyq kolledjiniń dırektory Álıma Ábdihalyqova. Shara sońynda qatysýshylar mere­kelik jıyn týraly pikir bildirip, mem­lekettiń qalyptasýyndaǵy Elbasy eńbegin atap ótti. Erjan BAITILES, «Egemen Qazaqstan QYZYLORDA