Qazaqtyń qadirin bizdiń áýlet jaqsy biledi

Arǵy atalarymyz Qazaqstanǵa shamamen ótken ǵasyrdyń 30-jyldarǵy qýǵyn-súrgin kezinde qonys aýdarypty. Atam sol kezde nebári alty jasta ǵana eken. Ol jetimdikti de, joqshylyqty da, áıteýir ómirdiń  bar aýyrtpalyǵyn basynan ótkizgen. Áıtse de, ul-qyzdaryna jaqsy tárbıe berip, jaqsylyqty umytpaýǵa baýlydy. Anam Qyzylordada, ákem Almaty oblysyndaǵy Úshtóbe qalasynda dúnıege kelgen. Qysqasy, bizdiń áýlettiń úshinshi urpaǵy Qazaqstanda ómir súrip jatyr. Qazaqstan táýelsizdik alǵan sátte «Aldaǵy taǵdyrymyz qalaı bolady?» dep alańdaǵanymyz ras. Degenmen, qazaq jerinde birjola  qalýǵa bekindik О́ıtkeni, týǵan-týystarymyzdyń bári osynda, ata-babalarymyz da osynda jerlengen. Onyń ústine biz basqa jerden baqyt tappasymyzdy burynan da biletin edik. Onyń qysqasha tarıhy tómendegideı. Biz Qyzylordada óte jaqsy turdyq. Atam sovhoz dırektory, ákem áskerı jýrnalıst edi. Meniń týylǵanyma bir aı tolǵanda ákemniń qyzmet babymen Tambov qalasyna kóshýine týra kelipti. Týystarymyz  ákeme qonys aýdarmaýǵa aqyl-keńesterin aıtqanymen, ol tyńdamapty. Sonymen ne kerek, attaı alty jyl Reseıde turdyq. Biraq óte qıyn boldy. Qalyń qazaqtyń ortasynda ósip-óngendikten, áke-sheshem jańa ortaǵa kóndige almapty. Anam tipti shydamaǵan, onyń ústine tórkini de Qazaqstanda. Olar ózderin Reseıde bóten adam sııaqty sezinedi. Minez-qulqy, is-áreketi túgel derlik qazaqtardan aýmaıtyn áke-sheshem 1980 jyly Qazaqstanǵa qaıta oraldy. Qazaqstanǵa alǵash qonys aýdarǵanda qazaq halqy kómektespegen bolsa, ómir súrýimiz tipti qıyn bolar edi. Ata-ájemiz balalarynyń aýzynan tamaǵyn jyryp bergen jergilikti halyqqa ylǵı da alǵys jaýdyryp otyratyn. qazaqstandyq árbir koreı qazaq jerine kelý tarıhyn jaqsy biledi. Sol úshin shúkirshiligin aıtyp otyrady. Prezıdent Nazarbaev 1 naýryzdy Alǵys aıtý kúni dep belgiledi ǵoı. Bul Qazaqstan jerine eriksiz qonys aýdarǵan túrli etnostardyń mıllıondaǵan ókilderiniń qutty qonysyna aınalǵan qasıetti qazaq jeri men qonaqjaı qazaq halqyna degen rızalyǵynyń belgisi. Shyǵarmashylyq adamy retinde 20 jyldan astam mýzykamen aınalysyp kelemin. Túrli mýzykalyq stılderdi, standarttardy zerttep júrmin. Sessııalyq mýzykant retinde túrli jobalarda jáne toptarda óner kórsetemin. Qazir Qazaq ulttyq óner ýnıversıtetinde qyzmet etemin. Ýaqytym bolǵan sátterde tabıǵat aıasyna shyqqandy qatty unatamyn. Týrızmdi janym súıedi. Elimizde tabıǵaty sulý jerler kóp. Býrabaıdy jaqsy kóremin.  Táýelsiz Qazaqstan maǵan óte ystyq. О́ıtkeni,  ol meniń Otanym. Búginde shy­ǵar­mashylyǵymyz damyp, halqy­myz órkendep jatsa, ol Táýel­sizdigimizdiń arqasy dep aıtar edim. Táýelsizdiktiń qadir-qasıe­tin bizdiń áýlet jaqsy biledi. Sergeı TEN, rejısser