Maqpal Isabekova 1,5 mln teńgege baǵalanǵan ınstagram paraqshasyn satty

Maqpal Isabekova taldyqorǵandyq Ásel Qasymhanova úshin ınstagram paraqshasyn satty, – dep habarlaıdy QazAqparat. Ənshi óziniń əleýmettik jelisin 1,5 mln teńgege baǵalaǵan. Saýdaǵa shyqqan paraqsha 10 saǵattan soń satylyp ketken. Maqpaldyń aıtýynsha, qyzyǵýshylyq tanytyp, satyp alam deýshiler legi əli de kóp kórinedi. Halyq tolassyz qońyraý shalyp, satyp alýǵa nıettenip jatqanyn aıtady. Aıta keteıik, Maqpal Isabekova óziniń jeke paraqshasyn satýǵa taldyqorǵandyq Əselge kómek kórsetý úshin, osyndaı qadamǵa barǵan. Əsel, qazir Qytaıda ota jasatqaly jatyr. Ol kólik apatyna ushyrap, bir aıaǵynan aıyrylǵan edi. Sońǵy kezde derti deńdep, adam tózgisiz aýrýǵa shaldyqqany jóninde əleýmettik jelige jarııalap, kópshilikten otaǵa kómek surap edi. Boıjetkenniń janaıqaıyna beıjaı qaramaǵan ənshi, sheshim qabyldap, paraqshasyn satýdy jón sanaǵan. «Men mundaı qadamǵa Əsel úshin bardym. Endi barlyq qarajatty oǵan jiberemin. Bar tilegim Əseldiń tezirek saýyǵyp, óz ortasyna oralýyn tileımin. Al paraqshamdy astanalyq boıjetken satyp aldy. Endi men tyńdarmandarymdy, halqymdy ózimniń jeke paraqshamda kútemin», – dedi ol. Maqpal Isabekova əleýmettik jelide oqyrmany kóp estrada juldyzdarynyń biri. Onyń paraqshasynda 1 mln nan astam adam tirkelgen.