Nazarbaev Sırııa boıynsha kelissózderdi Astanada ótkizýdi qoldady

Qazaqstan prezıdenti Nursultan Nazarbaev Sırııadaǵy qaqtyǵysýshy taraptardyń kelissózderin Astanada ótkizýge kelisim berdi. Bul jóninde Elbasynyń búgin Reseı jáne Túrkııa basshylary Vladımır Pýtın jáne Taıyp Erdoǵanmen telefon arqyly áńgimesi nátıjesinde málim boldy. Reseı men Túrkııa Prezıdentteri Elbasymen kún tártibindegi ózekti óńirlik jáne halyqaralyq máselelerdi talqylady. Reseı men Túrkııa kóshbasshylary Sırııadaǵy qaqtyǵysýshy taraptar arasyndaǵy ahýaldy beıbit retteýge arnalǵan kelissózderdi Astanada ótkizýge múddeli ekendikterin bildirdi. Nursultan Nazarbaev bul bastamany qoldap, Qazaqstan elordasynda mundaı kelissózder júrgizý úshin qajetti jaǵdaı jasaýǵa daıyn ekenin málimdedi» delingen Aqordanyń baspasóz qyzmeti taratqan habarlamada. Reseı men Túrkııa basshylary Nursultan Nazarbaevty Qazaqstan Respýblıkasy Táýelsizdiginiń 25 jyldyǵymen quttyqtap, Qazaqstan halqyna baq-bereke tilep, odan ary ósip-órkendeı berýine nıettestik bildirgen. V.Pýtınmen áńgimelesý barysynda Joǵary Eýrazııalyq ekonomıkalyq keńestiń aldaǵy otyrysyna jáne UQShU sammıtin ótkizýge daıyndyq máseleleri talqylandy. Túrkııa Prezıdentimen sóılesý kezinde R.T.Erdoǵan Astanaǵa bıylǵy 12 jeltoqsanǵa josparlanǵan is-saparynyń keıinge qaldyrylǵanyna ókinish bildirdi. Túrkııa kóshbasshysy aldaǵy ýaqytta bizdiń elge kelýge daıyn ekenin aıtty. Qazaqstan Prezıdenti Sırııadaǵy qaqtyǵysty beıbit retteýge baǵyttalǵan halyqaralyq deńgeıdegi umtylystardy bizdiń eldiń áýelden qoldap kele jatqanyn atap ótti. 16 jeltoqsan kúni Vladımır Pýtın túrkııalyq áriptesimen telefon arqyly áńgime kezinde Sırııada qaqtyǵysýshy taraptar kelissóz júrgizetin alań retinde Astanany tańdaýdy usynǵan bolatyn. «Qazaqstan astanasy ondaı alań bolar edi. Eger qaqtyǵysýshy taraptar kelisse, biz Prezıdent Nazarbaevqa osy prosesti qoldaýdy surap ótinish jasaımyz» degen-di Reseı basshysy.