«Astana» oıynshysy «Sportıng» komandasyna aýysýy múmkin

«Astana» komandasynyń jáne Serbııa ulttyq quramasynyń jartylaı qorǵaýshysy Nemanıa Maksımovıch Portýgalııanyń «Sportıng» klýbyna aýysýy múmkin. Bul týraly vesti.kz habarlady. A Bola basylymynyń málimeti boıynsha, fýtbolshynyń agenti Vladımır Iýgovıch Lıssabon qalasyna osy iske baılanysty kelgen. Portýgalııalyq klýbtyń basshylyǵy kelissózderdi tezirek aıaqtap, Maksımovıchti qysqy transferde óz qatarlarynan kórýdi josparlap otyr. Buǵan deıin serbııalyq fýtbolshyǵa Belgııanyń «Standarty» eki mıllıon eýro usynǵan bolsa, ıspanııalyq «Valensııanyń» bas jattyqtyrýshysy Chezare Prandellı qyzyǵýshylyǵyn rastaǵan bolatyn. Maksımovıchtiń «Astanamen» kelisimsharty 2017 jyldyń maýsym aıynda aıaqtalady. FIFA-nyń erejesi boıynsha ol qańtar aıynda kez kelgen komandamen aldyn ala kelisim jasaı alady. «Astananyń» bas menedjeri Saıan Hamıtjanov sheteldik klbýtardan usynys túskenin rastady. Osy qysta elordalyq komandadan ketýi ábden múmkin. Nemanıa Maksımovıch elordalyq ujymnyń sapyna 2015 jyldyń aqpan aıynda kelgen. Búginge deıin eki márte el chempıony atanyp, bir ret Qazaqstan Kýbogynda jeńiske jetken. Premer-lıgada 54 oıynǵa qatysyp, 9 goldyń jáne 6 nátıjeli pastyń avtory atandy. Sonymen qatar, óz klýbyn Chempıondar lıgasy men Eýropa lıgasynyń toptyq kezeńine ótýine septigin tıgizgen. Budan bólek, ol 2015 jyly Serbııanyń jastar quramasymen (U-21) álem chempıony atansa, bıyl negizgi quramaǵa alǵash ret shaqyrtý alyp, úsh joldastyq kezdesýge qatysty. Aıta keteıik, Maksımovıchke Ispanııanyń «Sevılıa», Anglııanyń «Manchester Iýnaıted», «Vest Hem», Italııanyń «Mılan», «Roma», «Torıno», «Inter», «Djenoa», Horvatııanyń «Dınamo», Reseıdiń «Spartak», Shveısarııanyń «Bazel», Germanııanyń «Nıýrnberg», «Aıntraht», «Gambýrg», sondaı-aq Fransııanyń «Olımpık Marsel», «Lıon», «Nant» jáne «Monako» komandalary qyzyǵýshylyq tanytqany týraly álemdik BAQ habarlaǵan bolatyn.