Qoǵamdyq keńes jyldy qorytyndylady

«Astana EKSPO-2017» UK» aksıonerlik qoǵamynyń ofısinde «EKSPO-2017» qoǵamdyq keńesiniń 2016 jyldy qorytyndylaýǵa baılanysty otyrysy bolyp ótti. Qoǵamdyq keńes músheleriniń jáne shaqyrylǵan sarapshylardyń aldynda aksıonerlik qoǵamnyń basqarma tóraǵasy Ahmetjan Esimov habarlama jasady. Ol 2016 jyly kompanııanyń qol jetkizgen negizgi jetistikterin tilge tıek etti. – Biz sizdermen osy jyldyń qańtar aıynda qoǵamdyq keńestiń alǵashqy otyrysynda kezdesken edik. Sodan beri bir jylǵa jýyq ýaqyt ótti. Bul jyl qaýyrt jumystarǵa toly ári nátıjeli boldy. Jaqynda Elbasy Nursultan Nazarbaev kórme qalashyǵynda bolyp, EKSPO qalashyǵy aýmaǵyndaǵy eskertkish stellany saltanatty jaǵ­daı­da ashyp, atqarylǵan jumysqa oń baǵa berdi. Osy oraıda, qurylysqa qatysty sóz qozǵaıtyn bolsaq, biz búkil jumysty zańdy negizge qoıdyq. Eń aldymen, jobalyq-smetalyq qujattamany ázirledik jáne memlekettik saraptama aldyq. Jumys barysynda biz qomaqty qarjy únemdedik. Ony EKSPO qala­shy­ǵynyń barlyq nysandary boıynsha qorytyndy saraptama alǵan kezde dálirek aıtatyn bolamyz, – dedi Ahmetjan Esimov. Tóraǵanyń aıtýy boıynsha, búgin­de halyqaralyq pavılondardyń qu­rylysy tolyq aıaqtalǵan. Endi olardy qatysýshy memleketterge berý jáne bul pavılondardy kontenttik to­lyqtyrý jumystary bastalǵan. Búgin­gi kúnge deıin kórmege qatysýshy 8 mem­leket, atap aıtqanda, Belarýs, Vengrııa, Germanııa, Qytaı, Reseı, Sıngapýr, Túrkııa jáne Fransııa mem­le­­­ket­­teri ózderiniń pavılondaryn ja­raq­­­tandyrýǵa kirisken. Jańa jyldan keı­in bul jumys qaýyrt qarqyn alǵaly tur. Sonymen birge, qatysýshylardyń qyz­­metkerlerine turǵyn úılerdi bólý má­­selesi de qyzý júrgizilýde. Osy ýa­qyt­­qa deıin kórme komıssarlarynan 324 sura­nys kelip túsken. Páterler qa­­tysýshy elderdiń qyzmetkerlerine jal­ǵa beriledi. EKSPO-2017 kórmesi aıaq­talǵannan keıin bul páterler qaza­q­­standyqtarǵa satylatyn bo­lady. Sóı­tip, elordamyzdyń turǵyn úı qory taǵy da zamanaýı 4 400 qolaıly páter­ler­men tolyǵady. Ahmetjan Esimov atap kór­set­ken­deı, EKSPO-2017 halyqaralyq maman­dan­dyrylǵan kórmesi bul daǵdarysqa qarsy is-qımyl jobasy bolyp tabylady. Álemdik ekonomıkalyq jáne qarjy daǵda­ry­sy­ beleń alǵan kezeńde otandyq taýar ón­di­rý­shilerge qoldaý kórsetý maqsatynda EKSPO-2017 kórmesi aıasynda elimizdiń bar­lyq oblystarynyń ákimderimen memorandým­dar jasaldy. Osynyń nátıjesinde 322 otandyq taýar óndirýshilermen jalpy somasy 48,9 mıllıard teńgeniń kelisimsharttary bekitildi. Bul joba Qazaqstanda 50 myń jumys ornyn quryp, ekonomıkalyq daǵdarys kezeńinde jumyssyzdyqtyń beleń almaýyn qamtamasyz etti. Sony­men birge, EKSPO kórmesi ulttyq jobasyna 126 mıllıon demeý­shilik qarjy jáne 211 mıllıard teńge ınvestısııa tartylǵan. Qoǵamdyq keńestiń jyl qorytyn­dy­­syna arnalǵan otyrysynda keńes tó­ra­ǵasy, L.N.Gýmılev atyndaǵy Eýra­zııa­ ýnı­ver­sı­tetiniń rektory Erlan Sy­dyqov sóz alyp, 2017 jyly ýnıver­sıtet bazasynda kórmeni ótkizýge belsendi qatysatyn gıdter men saıahat júrgizýshilerdi daıarlaý boıynsha ortalyq qurý ıdeıasyn usyndy. Sony­men birge, ol halyqaralyq kór­me sheńberinde ishki týrızmdi damytý maqsatynda «Astana – Baıqońyr – Astana» jáne «Almaty – Baıqońyr – Almaty» tikeleı áýe baǵyttaryn ashý j­á­ne sheteldik týrısterdiń keshenge ki­rýg­e ruqsat alý merzimin 45 kúnnen 14 kúnge deıin qysqartý týraly másele kóterip, usynys aıtty. Joǵaryda atap kórsetkenimizdeı, EKSPO-2017 qoǵamdyq keńesiniń al­ǵashqy oty­rysy 2016 jyldyń 26 qań­t­arynda ótken bolatyn. Sodan bergi mer­zimde qoǵamdyq keńes konsýl­ta­tıvtik keńesshi organ retinde 50 baǵaly ke­pil­demeler men usynystar bergen osy otyrys barysynda da qoǵamdyq keńes elimizdiń memlekettik organdaryna mańyzdy 10 usynys pikir joldady. Bul usynystardyń ishinde, elimizdiń týrıstik obektileri men demalys aı­maq­­tarynyń baǵyttaryndaǵy jol boıy­n­da ınfraqurylymdy jaqsartý, «Baıqońyr» ǵarysh aılaǵynda týrızmdi da­­mytý jónindegi baǵdarlamany bekitý, BUU-nyń qamqorlyǵymen Jasyl tehnologııalar jáne ınvestısııalyq jobalar ortalyǵy bazasynda jańa ósip kele jat­qan kompanııalardy qarjylandyrý úshin syrtqy ınvestısııalardy tartý múmkindigin qarastyrý jáne basqa ózekti máseleler bar. Otyrys qorytyndysynda «Astana EKSPO-2017» UK» AQ-tyń basqarma tóraǵasy Ahmetjan Esimov qoǵamdyq keńestiń barlyq múshelerine jyl ishinde jumysqa belsendi qatysqandary úshin shynaıy alǵysyn bildirip, kele jatqan jańa jylda sáttilik pen tabys tiledi. Jylqybaı JAǴYPARULY, «Egemen Qazaqstan»