Qazaq tilindegi termın sany 27 myńǵa jetedi

«Nur Otan» partııasynyń Ortalyq apparatynda partııa janyndaǵy «Mıras» respýblıkalyq keńesiniń kezekti otyrysy ótti, dep habarlaıdy partııanyń baspasóz qyzmeti. Parlament Májilisiniń depýtaty, partııanyń saılaýaldy baǵdarlamasynyń «Birlik pen kelisim» baǵyty boıynsha partııalyq kýratory Máýlen Áshimbaevtyń tóraǵalyq etýimen ótken is-sharaǵa Parlamenti Senatynyń jáne Májilisiniń depýtattary, Qazaqstan halqy Assambleıasynyń ókilderi, ǵylymı jáne shyǵarmashylyq zııaly qaýym, ýákiletti ortalyq memlekettik organdardyń ókilderi jáne «Mıras» respýblıkalyq keńesiniń músheleri qatysty. Otyrystyń kún tártibinde Qazaqstan Respýblıkasynyń Úkimeti janynan qurylǵan respýblıkalyq onomastıkalyq jáne termınologııalyq komıssııalardyń aralyq qorytyndy jumystaryn talqylaý, sonymen birge «Mıras» keńesiniń 2016 jylǵy jumystaryn qorytyndylaý, sondaı-aq keler jylǵy jumys josparyn bekitý máselesi qaraldy. Onomastıka jáne termınologııa salasyndaǵy atqarylǵan is-sharalar týraly Mádenıet jáne sport vıse-mınıstri Aqtoty Raıymqulova baıandama jasap: «Táýelsizdik jyldary qol jetkizgen jetistikterdiń biri - jer-sý, obektilerniń ataýlaryna biryńǵaı kózqarasty qalyptastyrý, olardyń esebin júrgizý tarıhı ataýlardy qalpyna keltirý maqsatynda Onomastıka komıssııasynyń jumysy jolǵa qoıylyp, osy jyldar ishinde respýblıka boıynsha 1348 eldi mekenniń, 6 qala, 1305 bilim, mádenıet jáne sport mekemesiniń, 7958 kóshe men dańǵyl ataýy ózgertildi», - dep habarlady. Sondaı-aq, vıse-mınıstr termınologııa salasy boıynsha 2011 jylǵa deıin bekitilgen termınderdiń sany 10 myńǵa jýyq bolsa, 2015 jyly 3 myń termın, al bıyl 5 myńnan asa termın bekitilgenin jetkizdi. Komıssııa bekitken termınderdiń jalpy sany 18 myńdy quraıdy eken. Aldaǵy ýaqytta memlekettik baǵdarlama aıasynda bekitilgen termınderdiń sanyn 27 myńǵa jetkizý kózdelýde. О́z kezeginde mádenıettanýshy, pýblısıst Serik Erǵalı termınologııa salasyn ǵylym retinde qalyptastyryp, damytý úshin lıngvıstıkalyq ortalyqtar men kafedralar janyna termınologııa ınstıtýtyn qurý kerektigin aıtty. Aıta keteıik, partııanyń Saıası keńes bıýrosynyń sheshimine sáıkes ortalyq jáne óńirlik deńgeıdegi «Mıras» keńesine partııanyń saılaýaldy baǵdarlamasynyń «Birlik pen kelisim» baǵytynyń oryndalýyn monıtorıngileý, sonymen qatar, Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynyń júzege asyrylýyn partııalyq baqylaý jasaý qyzmetteri júkteldi. Osyǵan oraı, «Mıras» respýblıkalyq keńesiniń quramy til saıasaty salasynyń kásibı sarapshylarymen, sondaı-aq, birlik pen kelisimdi qamtamasyz etý, QHA ókilderimen jańartyldy.