Sabına Altynbekova óziniń voleıbol klýbyn ashady

Qazaqstandyq voleıbolshy qyz, Aqtóbe qalasynyń týmasy Sabına Altynbekova óziniń týǵan qalasynda voleıbol klýbyn ashpaq, - dep habarlaıdy "Dıapazon". Sportshynyń aıtýynsha, bul klýbta áıelder de, er adamdar da jattyǵa alady. "Biz áıelder arasyndaǵy komandalarǵa joǵarǵy lıga men premer lıga uıymdastyrǵymyz keledi. Sondaı-aq, biz osy klýbty voleıbolmen aınalysqysy kelgen kishkentaı qyzdardyń armanyn oryndaý úshin ashyp jatyrmyz", - dedi Sabına Altynbekova. Sonymen qatar, sportshy basylym tilshilerine qazirgi ýaqytta "Almaty" klýbynyń 23 jasqa deıingi qyzdarǵa arnalǵan ulttyq lıgasynda óner kórsetip júrgenin aıtty. Altynbekovanyń aıtýynsha, oǵan voleıboldy qoıyp, model bolýǵa da usynystar kelgen, alaıda ol budan bas tartqan eken. Sebebi Sabına úshin sport birinshi orynda. "Men kishkentaı kezimnen bastap ómirimdi sportmen baılanystyrǵym keldi, jetkim keletin maqsattar kóp", - dep keltiredi basylym sportshynyń sózin. Aıta keteıik, Sabına Altynbekova 2014 jyly Azııada jastar arasynda ótken chempıonattan soń tanymal bola bastady. Qazirgi ýaqytta sportshynyń Instagram jelisindegi jazylýshylarynyń sany 610 myńnan asqan. Sondaı-aq, osyǵan deıin Sabına Altynbekovanyń óz kıim jelisin shyǵaratyny habarlanǵan bolatyn. Sporttyq kıimderdiń bul jelisin Sabına Altynbekova otandyq Zibroo Sportswear dızaınerlik kompanııasymen birigip oılastyrǵan eken. Aıta keteıik, Rıo oıyndaryndaǵy Qazaqstan quramasynyń kıimderin osy kompanııa daıyndaǵan bolatyn.