Shahan kentinde qaza bolǵandardyń tizimi anyqtaldy

Qaraǵandy oblysyndaǵy Shahan kentinde oryn alǵan apattyń saldarynan qaza tapqan turǵyndardyń aty-jónderi belgili boldy. Apattyq-qutqarý jumystary barysynda úıindi astynan tómendegi  marqumdardyń múrdeleri tabyldy: V.M. Andropov, 1981 j.t. (jyly týǵan), O.V. Andropova, 1988 j.t., E.V. Andropova, 2016 j.t., V.I. Galyshev, 1960 j.t., A.A. Galyshev, 2010 j.t., T.K. Kan, 1953 j.t.,  V.S. Mıhaılov, 1956 j.t., E.Iý. Alekseenko, 1989 j.t., V.V. Alekseenko, 2016 j.t.. Sondaı-aq, qutqarýshylar qırandy astynan 1984 j.t. azamat A.V. Galyshevty aman alyp shyqty. Ol túrli jaraqattarmen Maqajanov atyndaǵy aýrýhanaǵa jetkizildi. Jergilikti bılik oryndary apat bolǵan úıdiń zardap shekken turǵyndaryna arnap «Berezka» bala baqshasynda jyly oryn daıyndap, ystyq tamaq berý sharalaryn uıymdastyrdy. Sonymen qatar, bul jerde qaıtys bolǵan turǵyndardyń týystaryna psıhologııalyq kómek kórsetý qyzmeti de qarastyrylǵan. Jalpy, apattyq-qutqarý jumystary kezinde 6 adam qutqarylyp, 10 turǵyn qaýipsiz jerge kóshirildi. Tótenshe oqıǵa oryn alǵan jerde jedel shtabtyń jumysy uıymdastyrylyp, apattyń sebep-saldaryn tekserý jónindegi oblystyq komıssııa qurylǵan. Shahtınsk qalasy ákiminiń sheshimimen jergilikti aýmaqta tótenshe jaǵdaı jarııalandy. Qazirgi ýaqytta jergilikti bılik oryndary opat bolǵan turǵyndardyń týystaryna marqumdardy jerleý boıynsha kómek kómek kórsetý sharalarymen aınalysyp jatyr. Oblys ákimdiginiń habarlaýynsha, zardap shekkenderge qarjylaı kómek kórsetý boıynsha arnaıy esep shot ashylady. Búgin, ıaǵnı 2 qańtar kúni saǵat 13.00-de qulaǵan úıdiń úıindisin arshý boıynsha negizgi jumystar aıaqtaldy. Bul sharaǵa 286 adam jáne 55 tehnıka birligi jumyldyrylǵan bolatyn. Aıta keteıik, 1 qańtar kúni Qaraǵandy oblysyndaǵy Shahan kentinde bes qabatty turǵyn úıdiń buryshy opyryp qulap túsken bolatyn. Toǵyz adamnyń ómirin jalmaǵan bul apatqa avtonomdy jylý júıesi qazandyǵynyń jarylýy sebep bolǵan. Qaırat Ábildınov, «Egemen Qazaqstan»