О́tken jylǵa ókpe joq. 2016 jyly Qazaqstan Respýblıkasy Táýelsizdiginiń 25 jyldyǵyn atap óttik. Elimizdiń bas basylymy – «Egemen Qazaqstan» gazeti de Táýelsiz memleket retinde qalyptasýdyń alǵashqy shıreginde atqarylǵan orasan eńbekti tarıh jadyna saqtaýǵa, urpaqtar esinde máńgi qaldyrýǵa qaltqysyz qyzmet etti. Endi sanaýly kúnderden keıin Alataý baýraıynda alaýy jaǵylatyn qysqy Ýnıversıada oıyndary, Astana tórinde ótetin EKSPO-2017 kórmesi, Qazaqstannyń BUU Qaýipsizdik Keńesine turaqty emes múshe retinde qyzmetke kirisýi sııaqty álemdik deńgeıdegi aıtýly oqıǵalardyń barysy men Alash qozǵalysynyń 100 jyldyǵy sııaqty ult rýhanııaty men tarıhyndaǵy mańyzdy is-sharalardyń atalyp ótilýi de basylym jumysynyń negizgi baǵdary bolady. Jyldy jemisti qorytyndyladyq. Basylymnyń jumysyna jańa basqarý menedjementin engizýmen qatar, gazettiń bederi men beınesin dástúrdi saqtaı otyryp jetildirýdi qolǵa alyp, sátti júrgizdik. Nátıjesinde gazet betinde arnaıy aıdarlar, better ashylyp, sarapshy mamandar minberi oqyrmanǵa jol tartty. «Egemen Qazaqstanda» álemdik tájirıbege negizdelgen, kolýmnıst-sarapshylar men avtorlar baǵany jaryq kórdi. Basylymnyń mazmundyq sapasy artyp, jedel ári senimdi aqparat taratý talaby jolǵa qoıyldy. Mine, Elbasynyń maquldaýymen, Aqparat jáne kommýnıkasııalar mınıstrliginiń qoldaýymen gazet formatyna zamanǵa saı ózgeris engizildi.
Qoldaryńyzdaǵy «Egemenniń» kezekti nómiri eýropalyq úlgide basyldy. Bul – ári yqsham, oqýǵa, alyp júrýge yńǵaıly gazet formaty retinde álemde moıyndalǵan, dúnıe júzine tanymal The Financial Times nemese The New York Times sııaqty gazetter áldeqashannan jaryq kóretin úzdik format. Basylymdaǵy ózgerister «Egemenniń» shyǵarmashylyq ujymyna, gazet basshylyǵyna úlken senim men jaýapkershilik júkteıdi. Biz óz tarapymyzdan gazettiń mazmundy, sapaly, oqyrman úshin qyzyqty bolyp shyǵýyna kúsh salatyn bolamyz. Osy maqsatta salıqaly suhbattar, salmaqty saraptamalar, tushymdy taqyryptardy tarazylap jazý dástúri jalǵasa beredi. Qazirdiń ózinde oqyrman iltıpatyna bólengen «Bilim», «Tálim» sııaqty arnaýly betterdiń mazmuny baıytylyp, qoǵamdaǵy muǵalim mártebesiniń laıyqty baǵasyn alýǵa ári qaraı qyzmet etedi. Gazettiń «Rýhanııat», «Áleýmet», «Sport» sııaqty turaqty aıdarlarymen qatar qarapaıym oqyrmanǵa etene jaqyn basqa da turmystyq, tanymdyq qosymsha betterdiń tusaýy kesilmekshi. «Qazposhta» AQ málimetteri boıynsha, elimizdiń túkpir-túkpirinen 200 000-nan astam otandasymyz «Egemen Qazaqstannyń» turaqty oqyrmany bolyp otyr. Bul – qazaq oqyrmandarynyń turaqty tańdaýyn bildiretin kórsetkish. Biz óz tarapymyzdan oqyrmandarymyzǵa ystyq yqylasty alǵysymyzdy bildiremiz. Gazetke jazylyp úlgermegen aǵaıynǵa basylymdy jazdyryp alý qańtar aıynyń 10-nan qaıta bastalyp, jyl boıyna turaqty jalǵasatynyn da eske salamyz. Dástúrli qundylyqtar men til, dil, rýhanı mádenıettiń de sabaqtasa damýy úshin halyq pen baspasóz tonnyń ishki baýyndaı birlikte bolýy buljymas qaǵıda. Al, qazaq baspasóziniń kóshbasshysy sanalatyn «Egemen Qazaqstan» gazeti úshin bul qasterli mindettiń júgi tipten salmaqty. Bıylǵy jyly da «Egemen Qazaqstan» gazetiniń turaqty oqyrmany bolǵanyńyz úshin Sizge myń rahmet! 2017 jyldyń jaǵymdy jańalyǵy mol bolsyn, oıly oqyrman!
Darhan QYDYRÁLI,
«Egemen Qazaqstan»
