Qanshalyqty myń ólip, myń tirilip júrse de, aldaǵy atar tań, shyǵar kúnnen kúder úzbegen ata-babalarymyzdyń arman-tilegin júzege asyrý baqyty bizdiń úlesimizge tıipti. Qyryq atan túıege júk bolatyndaı osynaý orasan zor tarıhı jaýapkershilikti tereń sezine otyryp, búgingi kúni Uly Dalanyń birtýar perzenti Nursultan Nazarbaevtyń basshylyǵymen Qazaq eliniń óz ishinde ǵana emes, halyqaralyq arenada da aýqymdy jumystar atqaryp jatqanynyń kýásimiz.
Endi sol jahandyq deńgeıdegi jarqyn jetistikterimizdiń birine toqtalsaq, 2016 jyldyń 28 maýsymynda Qazaqstannyń Birikken Ulttar Uıymy Qaýipsizdik Keńesiniń turaqty emes múshesi bolyp saılanǵany belgili. Nıý-Iorkte BUU Bas Assambleıasynda ótken daýys berý nátıjesinde osy úderiske qatysqan 193 memlekettiń 138-i Qazaqstandy qoldap daýys berse, básekelesimiz – Taıland Koroldigin 55 memleket qana qoldady. Osylaısha, Qazaqstan – Birikken Ulttar Uıymynyń Jarǵysymen «halyqaralyq beıbitshilik pen qaýipsizdiktiń basty jaýapkershiligi» júktelgen, turaqty jumys jasaıtyn álemdik mańyzy zor uıymnyń saıası organyna Ortalyq Azııadan saılanǵan alǵashqy el atandy. Endi minekeı, jańa jyldyń alǵashqy kúninen Qazaqstan Birikken Ulttar Uıymy Qaýipsizdik Keńesiniń turaqty emes múshesi qyzmetine resmı túrde kiristi. Elimiz osynaý mindetti 2018 jyldyń sońyna deıin atqarmaq. Atalǵan mıssııa Qaýipsizdik Keńesinde tóraǵalyq etýge, otyrys shaqyrýǵa jáne talqylanatyn kún tártibin túzýge quqyq beredi. Sonymen birge, BUU Qaýipsizdik Keńesine saılanýymyz aımaqtyń shıelenisti jaǵdaılaryna álemdik qoǵamdastyqtyń nazaryn aýdarýǵa, memleketimizdiń halyqaralyq bastamalaryn iske asyrýǵa, Astananyń jahandyq máselelerde mańyzdy ról atqaryp, «Eýrazııa keńistigindegi qaýipsizdik pen turaqtylyq faktory» retinde Qazaqstannyń ımıdjin kóterýge sebep bolmaq ári Otanymyz úshin ózekti máselelerdi kóterip, álem nazaryn aýdarýǵa múmkindik bar. Qazirgi zamanǵy shetin problemalardy sheshýge qatysý bizdiń aldymyzdan kóptegen eldermen jáne óńirlermen qarym-qatynastarymyzdy damytý úshin de barynsha múmkindikter ashady. Endigi jerde Qazaqstan kóshbasshylyq ustanymdaryn odan saıyn belsendi ilgeriletetin bolady. Naqty aıtqanda, Qazaqstan jahandyq problemalardy sheshýdiń joldaryn izdestirýge súbeli úlesin qospaqshy. Ásirese, Sırııadaǵy áskerı qaqtyǵysty toqtatýǵa kúsh salatyn bolady. Qazir onyń alǵysharttary da jasalýda. Oǵan Sırııa máselesiniń Túrkııa men Reseıdiń qatysýymen Astana alańynda jan-jaqty talqylanatyny dálel. Eger Irannyń ıadrolyq máselesin ońtaıly sheshýde Qazaqstannyń rólin eskerer bolsaq, Sırııada beıbit ómir ornyqtyrýǵa múmkindik týaryna senim bar. Munyń syrtynda, Qazaqstannyń BUU Qaýipsizdik Keńesiniń 2017-2018 jyldardaǵy turaqty emes músheligine saılanýyna baılanysty Elbasynyń úndeýinde aıtylǵandaı, biz jahandyq qoǵamdastyqtyń nazaryn buǵan deıingi kókeıkesti bastamalarymyzǵa aýdarý nıetindemiz. Olar ıadrolyq qarý men soǵys vırýstary jáne janjaldardan azat álem qurýǵa baǵyttalǵan. Naqty aıtqanda, BUU-nyń 2015 jyly ótken Bas Assambleıasynyń 70-shi sessııasynda jarııalaǵan terrorızmge qarsy bastamany ilgeriletýmen aınalysady. Aıta keterligi, Qazaqstan osy izgilikti maqsattaryna BUU-nyń qurylǵanyna 100 jyl tolatyn 2045 jylǵa qaraı qol jetkizý úshin jumys isteıtin bolady. Qazaqstan, sondaı-aq, sý-energetıkalyq jáne azyq-túlik qaýipsizdigi máselelerin qarastyrýǵa basymdyq bermek. Saıyp kelgende, Qazaqstannyń aldaǵy eki jylda Birikken Ulttar Uıymy Qaýipsizdik Keńesiniń turaqty emes múshesi retinde órkenıet damýynyń sara jolyna qosar úlesi mol bolyp, elimizdiń mereıin ústem eterine senimdimiz. Ári atalǵan oqıǵa tek Qazaqstan úshin ǵana emes, sonymen birge, Eýrazııa qurlyǵy úshin de, álemdik qoǵamdastyq úshin de nátıjesi áserli jáne mán-mańyzy aıryqsha bolady degen úmit te joq emes. Endeshe, barymyzdy baǵalaı bilgenimiz de, elimizdiń jetistigine qýana bilgenimiz de jón. Qoryta aıtqanda, Qazaqstannyń BUU Qaýipsizdik Keńesiniń 2017-2018 jyldarǵa turaqty emes múshesi bolyp saılanýy elimizge degen qurmet pen halyqaralyq bedeli tanylýynyń taǵy bir dáleli, sonymen qatar, Qazaqstannyń álemdik isterde belsendi ról atqara alatyny moıyndalǵanynyń aıǵaǵy.
Kenjebolat Joldybaı,
saıasattanýshy
