О́nimderin eksportqa shyǵarady

Elimizdiń aýylsharýashylyq óndirisi qazirgi kezde shıkizat shylaýynan ónimdi óńdeý jáne ázir azyq-túlik ónimderin shyǵarý belesine bet burdy. Solardyń biri, tipti biri emes-aý, biregeıi «Beles» kompanııalar toby desek, qatelespeımiz. Osynaý úlken óndiris oshaǵy ótken jyldy tabysty qorytyndylap, jańa jylǵa jańa mindetter belgilep otyr. Aıtalyq, atalǵan ýaqyt aralyǵynda mundaǵy óndirilgen un jáne un ónimderi joǵary sapaly qasıetterimen jáne básekege qabilettiligimen erekshelendi. Sonyń nátıjesinde, bul ónimder tek óz otandastarymyzdyń ǵana emes, sonymen birge taıaý jáne alys shet elderdegi tutynýshylar arasynda da bıik baǵaǵa ıe boldy. Osyndaı oń pikirdi «Beles» kompanııalar tobyna qarasty «Terekti maı kombınaty» JShS-na qatysty da aıtýǵa ábden bolady. Atalǵan kásiporyndy onyń burynǵy ıeleri ábden turalatyp, tıtyqtatyp tynǵany eshkimge de qupııa emes. Osyndaı synı kezeńde munda júrgizilgen qaıta jaraqtandyrý men jańǵyrtý jumystary, ósimdik maıy óndirisin órkendetý jóninde belgilengen taktıkalyq jáne strategııalyq sheshimder kombınattyń ekinshi tynysy ashylýyna múmkindik týǵyzdy. Eń bastysy, otandyq ónim óziniń sapalyq qasıeti men básekege tótep bere biletindigi boıynsha ózge elderden jetkizilgen ózi tektes ónimderdi yǵystyra bastady. Bul tabystardyń bir syryn jańasha oılaı biletin, otandyq kásiporyn jetekshisi, «Beles» kompanııalar tobynyń basshysy, mereıli menedjer Murat Jákibaevtyń esimimen baılanystyryp júrgender de bar. Mysaly, osydan jyl buryn qazirgi «Beles» kompanııalar tobynda nebári 40 adam jumys jasap kelipti, al qazirgi kúni otandyq kásiporynda eńbek etetin jumysshylardyń sany 700-den asyp otyr. Olardyń alatyn ortasha aılyq jalaqylarynyń mólsheri de qomaqty. Bul ósý me, ósý, órleý me, órleý árıne. Onyń neshe ese ekenin kózi qaraqty oqyrman ózi túısinip otyrǵan shyǵar. Búgingi áńgimemizdiń basty qazyǵy «Belestiń» ótken jyly qol jetkizgen jetistikteri ekenin eskersek, osy oraıda oqyrmandar nazaryna taǵy birer derekti bere ketkenniń artyqshylyǵy joq sekildi. Aıtalyq, ótken 2016 jyly belestikter 32 000 tonna azyq-túlik ónimderin óndirgen bolsa, onyń tabany kúrekteı 20 myń tonnasy eksportqa shyǵarylypty. Bul az tabys pa? Az emes, árıne. Sonymen birge, «Belestiń» salyq tóleýshi ozyq otandyq kásiporyn retinde de bási bıik tur. Sózimiz jalań bolmas úshin buǵan da bir derek keltire ketken jón. Iаǵnı, ótken jyly «Beles» kompanııalar tobynyń bıýdjet qorjynyna, ıaǵnı memlekettiń ortaq qazynasyna túsirgen salyǵynyń mólsheri bir mıllıard bes júz mıllıon teńgege jýyqtady. Mine, «Beles» baǵyndyrǵan belesterdiń keıbir mysaldary osyndaı. Temir QUSAIYN, «Egemen Qazaqstan» Batys Qazaqstan oblysy