Úkimet basshysy Súleımenovke bızneske júktemeniń nelikten kóbeıgenin anyqtaýdy tapsyrdy

Ulttyq ekonomıka mınıstrligi bızneske júktemeniń nelikten artqandyǵyn anyqtaýy tıis. Bul týraly búgin Úkimettiń kezekten tys otyrysynda Premer-Mınıstr Baqytjan Saǵyntaev málim etti, dep habarlaıdy QazAqparat. «Qurmetti áriptester! Keshegi ózderińiz qatysqan Úkimettiń keńeıtilgen otyrysynda Elbasy tarabynan birqatar syn-eskertpe aıtylyp, naqty tapsyrma  berildi. Biz búgin sol tapsyrmalardy iske asyrý úshin baǵyt-baǵdarymyzdy aıqyndap,  tıisti sheshimderdi qabyldaýymyz kerek. Eń aldymen Memleket basshysy damýdyń uzaqmerzimdi kezeńinde 5 paıyzdyq ósimdi qamtamasyz etýdi  tapsyrdy. Qazaqstannyń ulttyq tehnologııalyq bastamasy dep atalatyn 2025 jylǵa deıingi strategııalyq damý  josparynyń basty maqsaty osy bolýy tıis. Elbasy atap kórsetkendeı, buǵan jetýge ekonomıkamyzdyń múmkindigi de, áleýeti de jetkilikti», - dedi otyrysty ashqan Úkimet basshysy. Osy oraıda ol bıznes ahýaldy jaqsartý úshin  qabyldanatyn sharalarǵa toqtaldy. Memleket basshysy atap ótkendeı, bul baǵytta az jumys atqarylǵan joq. Biraq, bıznes júkteme artyp keledi. Bir jaǵynan biz bıznes júrgizýdi jaqsartý úshin zańnamaǵa ózgerister engizip, prosedýralardy jeńildetýdemiz. Sońǵy 5 jylda ruqat berý qujattaryn 3,2 ese qysqarttyq. Ekinshi jaǵynan dál osy kezeńde bıznestiń múddesine qatysty normatıvtik-quqyqtyq aktiler kerisinshe 1,7 esege artyp ketken. Onyń 80 paıyzy ákimdikter men máslıhattardyń aktileri.  Ulttyq ekonomıka mınıstrligine   bul máseleniń mán-jaıyn anyqtaýdy tapsyramyn», - Saǵyntaev.